Blancke, Dick (1952)

Dick is geboren in Schoonebeek. Daor is e ok opgruid en is e naor de legere schoel en de Ulo west. Daarnao hef e het ‘Nationaal Instituut veur Middelbaar Economisch en Technisch Onderwijs’ in Utrecht bezöcht, een veerjaorige opleiding veur vörmgeving. Nao dizze opleiding is e toch een aandere kaant opgaon en hef e de ‘Middelbare Beroepsopleiding Sociaal Kultureel Werk’ in Hengelo daon. Hij warkte u.a. in het jeugdwerk in Schoonebeek en Börger en weur groepsleider in het Boddaert Centrum in Emmen.
Dit directe contact met kinder leverde hum ideeën veur zien verhaolen veur kinder. Um meer tied te kriegen um te schrieven is e dieltied-metwarker van het cultureel centrum worden. Dick was antrökken um de publiciteit rondum de programmering te regeln.

Dit was ok het begun van zien loopbaon bij de radio. Veur Radio Noord leverd’e körte Drèentse bijdraoges in het programma Mandielig en kreeg e daarnao een eigen kinderpregram 'Het is Dik aan…', diels Drèents, Nederlands en Grunningstaolig.

Hij woonde in Nieuw-Zwinderen en van 1991 tot 2001 in Linde. Daarnao gung e met zien vriend Ronald in Arles sur Tech in Zuud-Frankriek wonen.
Zien eerste bijdraogen in de Drèentse taol waren liedteksten veur de rockgroep Turf Jenever en Achterdocht, waor Dick ok zanger van was. Hij is een poosie redacteur van Roet west. Hij publiceerde ok gedichten in Roet.
Dick Blancke was ok de eerste Drèentse schriever die openlijk het thema homoseksualiteit in zien gedichten gebroekte. Zien eerste publicaoties undertiekend’e allèn met zien initialen.
Hij schreef tenielstukken, kinderverhaolen en poëzie.

Wark van hem weur opneumen in Drèents kienderboek, (Zuidwolde 1984 en herziene oetgaove 2002) en een koppel bloemlezings. Zien poëzie is nog niet bundeld.

Boekpublicaoties:

-Samen kuj een hieleboel, (Zuidwolde 1986),

-Kobus Knien op pad met Ad de Kat (Zuidwolde 2000) Dit prentenboek hef e saomen maokt met de tiekenaores Trudy Kramer. Van dit boek verscheen ok een Grunningse oetgaove.
-Hij schreef de verhaolen voor het lied- en verhaolenboek 'Tattoo op mien scholderblad' (Zuidwolde 2001) dat saomen met een CD met kinderliedties oetbracht weur.

Ok vanoet Frankriek is Dick nog actief op schriefgebied. Het leste aovendvullende tenielstuk van Vrouwentoneel Erica 'Wat zul Anna zegd hebben' is deur hum schreven.
-De tekst veur het stripverhaol ‘Ellert en Brammert – twiej roege ropperds’ is ok van hum (de tiekeningen bint van Ben Huisjes).

-Twie ezels en meer ... Verhalen uut Frankriek (meert 2017, Het Drentse Boek-Beilen)

 

In meert 2010 verscheen het schrieverspetret van Dick Blancke, Met oes beiden. Aj 't bestellen wilt, kuj hier klikken.

 


Hieronder kuj een gedicht van hum lezen.

Veerde mei

Straks legt ze weer die kransen
veur heur
die vuulen deur geweld
zij hadden heur
’n gele sterre as tieken opspeld
straks legt ze weer die kransen

Straks legt ze weer die kransen
veur heur
die vuulen deur geweld
zij hadden heur
’n rose dreihoek
as tieken opspeld

de aandre mörgen
ien krans onteerd
de linten d’r ofknipt
gieniene hef ’t leerd.

veertig-viefenveertig
Hitler maokt in mensen underscheid
opheden
eert ze zien slachtoffers
in underscheid

Straks legt ze weer die kransen
Veur heur
die vuulen deur geweld
in gedachten
stao ik daorbij
mien rose dreihoek
as tieken opspeld
in warklijkheid
zit ik in hoes
ik bin gien held

Oet: Vief jaor Roet