Alberts-Hofman, Janny (1929-2008)

Jantje Hofman weur geboren in Slien in een boerengezin. Gunk naor de huusholdschoel en ontwikkelde zich wieder deur het volgen van talencursussen en een dreijaorige cursus publiciteit. Trouwde in 1953 en weur actief in de christelijke vrouwenbeweging, as bestuurslid van de NCVB in Schoonebeek, en deur het ontwarpen en geven van cursussen.Janny Alberts-Hofman is in febrewari 2008 uut de tied ekomen.

Publiceerde in Oeze Volk en verscheiden bloemlezings. Publiceerde ok vèer Nederlaandstalige, religieus getinte dichtbundels (Kok, Kampen). Warkte mit an Psalms en gezangen in Drèents en vertalings van biebelgedielten. Was bestuurslid van de Drentse Schrieverskring.

Drentstaolige boekpublicaties: Het spinnewiel (poëzie, Assen 1978); Um hoes en hof (verhalen, Assen 1980); De draod löp deur (poëzie, Assen 1980); Liesterkrallen (poëzie, Zuudwolde 1987); Stemmen in de wind (poëzie, Zuudwolde 1997); Het zingende zaand (poëzie, Zuudwolde 2004)

In 2007 werd er in opdracht van Stichting Drentse Taol een videopetret maakt van Janny Alberts-Hofman.

In febrewari 2008 kwam Janny uut de tied.


In Memoriam Janny Alberts Hofman (* Noord-Slien 1929 - † Slien 2008)

Deur : Abel Darwinkel

Janny Alberts-Hofman, schriefster van Drèentse gedichten en verhaolen is op 13 feberwaori oet de tied kommen. Zij is 78 jaor worden.
Janny Alberts-Hofman is in 1929 as boerendochter geboren in Noord-Slien. Het leven op de boerderij van heur oldelu was drok en roezig. As klein wichie begon ze al met het opschrieven van heur gedaachten.
In 1953 trouwde ze met Geert Alberts en omreden Geert bij de NAM waarkte, kwamen ze in Schonbek te wonen. Geert was deur zien waark veul van hoes. Janny was dan allén en had dan genog inspiraotsie om te schrieven. Eerst schreef ze allén in 't Nederlaands, die gedichten binnen wat religieuzer van toon. Heur Nederlandstaolige waark is oetgeven bij Kok in Kampen.
Deur heur contacten met de Drentse Schrieverskring is ze laoter ok in het Drèents gaon schrieven. Doe Geert wat older was en wat meer tied had, binnen ze zowat 't heule land deurtrökken om op te treden, benaom veur Drèentse Vereeinings.
Janny Alberts-Hofman hef in de jaoren '70 en '80 bestuurslid west van de Drèentse Schrieverskring en van het Maondblad Oeze Volk. Zij hef metwaarkt an een bundel Drèentse kerstleeidties, an de vertaoling van psalms en gezangen en an het vertaolen van het biebelboek Jacobus.
Veur SONT, de Federatie van Streektaolorganisaties, hef ze ok veul waark daon. Janny en Geert woonden al weer jaoren in Slien. Met 'n beiden waren ze depotholder van Het Drentse Boek. Ze zörgden derveur dat de booukwinkels in Zuudoost-Drenthe Drèentstaolig waark in de kaasten staon hebben.
In oktober 2004 is de tiende en leste bundel van Janny Alberts-Hofman oetkommen; 'Het zingende zaand' een verzaomelbundel met gedichten en verhaolen.
Aander bundels van heur binnen: Het spinnewiel (1978), De draod lôp deur (1980), Um hoes en hof (1982), Gods glimlach (1982), Geef mij uw hand (1985), Terug naar de bron (1987), Liesterkrallen (1989), Groeien naar het licht (1990) en Stemmen in de wind (1997).
't Kun Janny nooit veul schelen of heur schrieverij literatuur neuimd wör. Het belangriekste veur heur waren de waardering van heur publiek en de toougankelijkheid van heur waark veur jong en old.
Schrieven dee Janny Alberts-Hofman benaom vanoet heur geleufsbeleving, het positief zeuiken naor de zin van het leven, verdreeit, geluk, onrust en rust, het verlangen naor eeinwording.

In meert 2007 hef het Huus van de Taol een schrieverspetret op video en dvd van Janny Alberts-Hofman prissenteerd. Albert Haar hef 't petret maokt.


Hieronder een keur oet de gedichten van Janny Alberts-Hofman


 

Moeder

Ik trök het laand oet van mien kindertied
waor 'k bliede was, vanoet de mallemeulen
luut 'k dreum en wark'lijkheden speulen
de wereld van de groten mooi en wied

ik trök het laand oet van mien kindertied
'k zag moeder, klein under de hoge linden
zie bad dat ik mien weg much vinden
want wat heur ogen zagen, zag ik niet

ik trök het laand oet van mien kindertied
het asfalt van de weg blunk mij integen
al lopend zag ik dobben met verbörgen zeer

nao jaoren, mien kinder in de mallemeulen weer
de tied dreit stil weerum tot het moment
in 't bield van moeder he'k mijzölf herkend.

Oet: Het zingende zaand'

De dood

Dit is de dood die onverdacht
kan toeslaon as een stil verraod
en zo het iens gezeide zaod
döt rusten in een lange nacht

dit is de dood die iezig kil
het lichem rust gef asof 't wacht
de rimpels wegstrik en verzacht
het zörgelijk gezicht zo stil

dit is de dood, maor hoger steeg
de ziel, zo wied en toch zo nao
- gien muren, as een vogel vrij –

maor in mien kaomer is 't zo leeg
a'k bij de aolde dingen stao
dan reert 't in mij, veurbij, veurbij.

Oet: Het zingende zaand'

Dwaze moeder

Wied van hoes en hof vandaon
loopt moeders met heur droef verhaol
heur stille gang sprek harde taol
het woord is raodeloos vergaon

maor wieder vort komp dichterbij
wij loopt in vrede hier de tocht
mien spandoek hoger naor het locht
hier maakt de zun de dag nog nei

et onrecht lig vlak veur mien raam
de stilte dwingt mij en ik luster
de dwaze moeder wordt mien zuster
en de vermisten kriegt een naam

eerst bint het letters die ik spel
vrömd is de klank maor 't wordt mij iegen
het kind da'k in mien arm mug wiegen
verdriet graaft dieper, tot de wel

en Rachels reert en rouwt, zie loopt
heur stille tochten, vraogt en hoopt

Oet: Het zingende zaand'

Boedel-scheiding

Stoelen um de taofel
iens zo vertrouwd
bint boedel worden

en het servies
waor moe zo wies met was
wordt non verdield
gedachten zwarft met in de tied
en juuste woorden bint er niet

't olde dressoir
te old um mooi te wezen
- in het vermolmde holt
kuj nog de tied oflezen -
blif staon
vergaon
zoas het leven zölf vergiet
en juuste woorden bint er niet

wat rakkerig spul
waormet iens warkerige haanden
hemmelden um hoes en op het laand
blif op de deel nog hangen
het wordt verbraand
en in de gloed is 't of de baand
verbreuken wordt met wat bestund
wat oes nog bund
het gef een leeg en stil verdriet
en juuste woorden bint er niet.

Media