Hoving, Geesje (1948)

Geesje Hoving is op 28 november 1948 in Raol geboren. Zie is daor ok groot worden en sinds 2009 woont ze daor ok weer.

Geesje Hoving schref graag in heur moedertaol. Zie denkt en vuult ok Drèents. In de lezings die ze gef komp ze altied op veur de Drèentse cultuur en taol. Het schrieven van gedichten komp bij heur opborreln.
Ze beschref de ontdekkings van het leven, of zoas zie het zölf zeg: "het jaank hebben naor mèensen en naor de kindertied".

 

 












  Der bint twie bundelties van heur oetgeven.

  • Met de herfst ben ik thuis (Nederlandstalig)
  • Kom as de katties bluit.( 1995, Het Drentse Boek)


Het gedicht daw oetkeuzen hebt is ien van heur dierbaorste gedichten waorin wanhoop, angst en bliedschup in körte tied naor veuren komt: Opnaome.


Opnaome


Nachtpon, undergood,
een nei stukkie zeep
haorkammegie een buusdoek
pen en papier
hoesdeur valt toe

Deuren gaot automatisch lös
witte kaomers doemt op,
ledikanten met zieken
waachtenden met bloemen
muren met- en gien ansichtkaorten
underzuken, niet weten
waor aj an toe bint

Zundagmörgen een Godshoes

De lift haolde ze
in nachtpon en zundagsgoed
Hij neugde ze oet
Hij leup met ze op
Hij braacht ze bij mekaor
het lieden deelde Hij
leeifde gaf Hij

Zaacht staomelden zij:
"Dank o Heer, dat Je
ous anspreuken".