Woldman, Tieme (1965)

Tieme Woldman is geboren in Assen, opgruid in Wiester en woont momenteel in Zeewolde waor hij warkt as freelance softwareontwikkelaar wat eigenlijks ok een vörm van schrieven is, want software wordt immers ok ‘schreven’.
Zien beide grootmoeders waren verhalenvertelsters pur sang en gaondeweg begreep hij dat zien grootmoeders met heur verhalen de mèensen waor as zij over vertelden zo in zekere zin in leven hölden.
En zo speult het principe dat ‘zolang as mèensen je verhaal vertelt, daj dan eigenlijks wieder leeft’ een belangrieke rol in zien schriefwark dat factief van aord is in de zin dat hij feitelijke geschiedenis samen lat gaon met de fictie van zien iegen invulling en veurstellings.
Zien eerste boek, de misdaadroman Moord in het Mantingerveld is zodoende een vrije interpretatie van de nimmer opgelöste dreivoudige moord in Koekangerveld in 1909 waormet toch ok weer het verhaal van de slachtoffers ‘in leven’ holden wordt.
Wat opzet angiet schref Tieme Woldman, die een groot liefhebber van documentaires is, in een documentaire-achtige vörm waorin naost verhaallijnen met gebeurtenissen ok vertellers in de rol van betrökkene of getuge an het woord komt.
In zien zeer körte verhalen (Hard gras, Roet, Maandewark) schetst hij biezundere, en tegeliekertied toch ok weer gewone mèensen en situaties, waorin zien liefde veur sport geregeld terug komp.

Moord in het Mantingerveld.

Het is 1938. Mit de dag greuit de dreiging van Hitler en nazi- Duutslaand in het arme Drenthe.
Het volk kan met meuite de endties an mekaar knuppen en vecht veur een karig bestaon.
De ellende van alledag wordt iniens an de kaante edrukt deur een gruwelijke vondst in
het Mantingerveld.
De mieste inwoners denkt dat de dader of daders in heur eigen omgeving te vienden is,
maar de oldste man van het dorp wet dat allent de duvel zelf tot een dergelijke daad in staot is.
Moord in het Mantingerveld is zowel in het Drents (dialogen) as in het Nederlands eschreven en is een
vrije interpretatie van de geschiedenis van de nooit opeloste moorden in het Koekangerveld in 1909.

In 2015 verscheen de novelle  Mannen bint maakt van jongens (Eigen beheer)


Aander wark van Tieme Woldman:

Korte verhaalties:

Manuel(a)

De aanderen gungen nao zeuven of acht jaor terug hen
bargdarpen in de Pyreneeën of kochten dat stuk laand met
siniesappelbomen in Valencia dat ze non èendelijk betaalden kunden,
maor hij bleef in Hoogeveen en leesde iedere dag in de pauze op zien
wark bij Thomassen & Drijver hardop oet Elsschots Kaas,
‘ie schrieft “kaas” maor wij zegt hier “kees” of “keze”’.
En tegen collega Kees zee hij dan weer ‘Kaas’ en die leut dat zo.
Maor nao negen jaor kun ’t wichtie van de kantine hum goed verstaon
en zee zij èendelijk ‘ja’ tegen hum en zien achternaam, teminste as
hij niet Jacques Herb op de bruloft zul zingen.
En nog altied legt zij an iederien gepast trots de situatie oet as ze
argens heur achternaam möt zeggen en de leste jaoren voegt ze
daor aal vaker ‘Ja, maor gien femilie van’ an toe.
Maor de eerste tied naodat Iniesta in 2010 ’t doelpunt zette in de
finale tegen Nederland, gebroekte ze allén heur meissiesnaam.

 

Typisch

As jongens fietsten A. en R. en ik altied met oes dreien en dan fietste R. altied allènig achteran
want umdat hij Asperger har maakte dat volgens hum toch niet oet.
Maor R. was wal degiene die “Henk” op ’n vrijdagaovend bedacht 
en vanof toen fietste Henk altied links naost R. met oes met.
Henk har puntleerzen, reed motor op zien zestiende, kreeg  ’s aovends bijles
van de Engelse lerares bij heur thoes, drumde, reisde zommers deur Amerika,
en hij sleup bij Harry Muskee en Herman Brood op de boerderij in Grollo – veur oes altied met ien o.
En toen wij aolder weurden, gruide Henk met oes met en vanof dat wij verkering kregen
was Henk aal vaker op tournee en as ’n wichie deurvreug wat Henks achternaam was,
of waor hij woonde, dan maakten wij de verkering oet.
En later toen wij trouwden, verhoesde Henk veurgoed hen Amerika waor hij van kust hen kust toerde
en kwam allén terug veur de begrafenis van Herman Brood of veur ’n concert waor hij dan drumde
en A. en R. en ik hen gungen en groupies of de Engelse lerares dan op hum wachtten in zien kleedkamer
– want jongens waren en bleven wij.
Maor ’n jaor leden belde R. ’s aovends dat Henk overleden was, precies tegeliek met Harry Muskee, ‘da’s typisch net wat veur Henk.’
En de aandere dag fietsten A. en R. en ik met oes dreien hen Grollo, hen de boerderij, en R. fietste allènig achteran.

 

Complot

Mien grootva geleufde heilig in techniek.
Hij kocht in 1968 as eerste ‘n klèurentillevisie
en hef Bob Beamon op de Olumpische Speulen van Mexico-Stad
’n wèreldrecord zien springen
en ’n jaor later de eerste mèens op de maon zien laanden.
Maor mien grootva hef nooit geleufd dat ’n mèens warkelijk 8,90 meter ver kun springen.

 

Legendarisch

Sas Király hef nooit bestaon en toch hurkt hij op een zwart-wit elftalfoto naost mien va en lacht hij, net as de aandern, naor mien moe.
En aanderhalf jaor later verongelukte hij - die jonge met die monobrow - met de motor, argens achter op Tiendeveen;
en vanof toen vertelden mien va en de aandern over Sas Király, de beste voetballer die Nederland ooit had hef,
en dat die met heur in het darde van Wiester speuld har.
Een paar jaor daorveur hadden ze hum ophaald oet Oostenriek,
waor as Sas - hangend tussen de assen van een gammele vrachtwagen - oet communistisch Hongarije hen het vrije westen vlucht was;
de linksback van het darde correspondeerde al tieden met Sas, zodoende.
En Sas har thoes met Puskás voetbald en hij was volgens zeggen nog beter as de latere Real Madrid-ster,
maor de geheime diensten zaten achter hum an en in het darde van Wiester völ hij niet op,
tenminste zolang as hij niet meer as drei of veer doelpunten in een wedstried zette.
En nog altied wordt der verteld over de wedstried tegen Beilen in 1961,
toen Sas acht doelpunten in ien helft zette.
En ondaanks da'k wel wus dat die jonge, die as zij Sas nuumden, toen al verongelukt was
en dat der in gien enkele kraant een wedstriedverslag met zien naam te vinden is,
begunde ik het verhaal van Sas Király, en dat van de acht tegen Beilen,
zölf ok te vertellen vanof het moment dat mien va mij vertelde
dat die jonge naost hum op de foto eigenlijks Arend Koning heette en dat Arend in het Hongaars Sas betiekent, en koning Király.

Media