Mensen-Siegers, Anneke (1940)

Anneke Mensen-Siegers is in 1940 geboren in Paais. Zij hef in heur leven ok in aander plaotsen woond, mor - zoas dat wel vaoker geeit - 't verlangen naor 't Noordenveld hef heur weerom brocht naor 't geboortedörp.

Van jongs of an hef Anneke veul belangstelling veur taol had.
Taol moet tougankelk wezen, vindt ze, allén dan kuj een groot publiek bereiken. Dat breeide publiek hef ze op verschillende maotschappelijke terreinen vunden.
Naost de schrieverij hef ze viefentwintig jaor mèensen trouwd en omreden bliedschup en verdreeit zo dicht bij 'nkander liggen, leidt ze ok al jaoren rouwdeeinsten. Bij beide gebeurtenissen kuj volgens heur in joen eigen taol dicht bij de mèensen kommen.

Op zeuventienjaorige leeftied is ze al begonnen met schrieven. Heur eerste teksten binnen plaotst in een Hollaands tiedschrift veur kinder en in de Leeikster kraant. Heur gedichten in het Noordenvelds verschienen al jaoren in Maandewark/Oeze Volk en in het Grunninger Toal en Taiken. Anneke Mensen is een volksschriever op de grèens van het Drèents en het Grunnegs, dat zeg ze zölf.

Zij hef begun jaoren '80 met een stuk of wat aandern een lesboouk veur het Noordenveld saomensteld en ok hef zij jaorenlaang lid west van de Drentse Schrieverskring.

Anneke Mensen hef een aantal bundels op heur naom staon.

 

  • Elke dag; Drintse gedichten en praotverzen. (Het Drentse Boek, 1985)
  • Vandaog, Drintse gedichten en praotverzen (Het Drentse Boek, 1988)
  • Overwegen (1995) (Oetgeverij Franken)
  • Ver-staon (2004, Oetgeverij kleine Uil)
  • Tied legt een wissel (2010, Oetgeverij kleine Uil)
  • Lokroup van een fladdervlinder (Het Drentse Boek, 2014)

Gebruuksanwiezing veur het wisse

wil je met mai
als oet de weck
een zuit en zacht deurtrokken gesprek
van diplomatiek
en zunig aofwogen woorden
die je laoten raoden?!

dan kuj het beter laoten
om met mai te praoten

want ein - zoals ik -
die het grunnegs in zien vezels het
van strak en vlak
is open en direct

het drents-eigen aarf
kint meer verbarg
gien recht is recht
en krom is krom
daorom...

 

Paaizer meul

as 'n slecht gebit
wör ai saneerd
wat aold en aof was,
oet de schraanken
of verweerd
wör restaureerd


in aolde glorie
staoj nou weer
as 'n jong kerel
in veur je taok
het graon
maolen tot meel
en 't gaait je vaok
veur de wind
je wieken slaogen
heur slag

en elke dag
vannaais
vraog wai
an bakker Koning
keuning van de meul van Paais
geef ons heden
ons daogelks brood

wai binnen bliede
't volk van Paais
met je opstaon
oet de dood

Oet: Vandaog gedichten en praotverzen, Stichting Het Drentse Boek, 1988

 

hej 't heurd

hej 't heurd
zo het 't verhaol
as 'n lopend vuur de ronde daon


hej 't heurd
zo is deur 't dörp
een naom deur 't sliek hingaon


hej ‘t heurd
't leedvermaok
kinde gien grins


hej 't heurd
't is weer gebeurd
kapot is weer ‘n minsk

Oet de bundel: ‘Elke dag'

 

veurjaor

't is veurjaor!
bloot liggen de akkers
zuk te baokern
as jonge vraaiers
in de eerste waarme
veurjaorszun

't is veurjaor!
trekkers trekken
in 'n paoringsdaans
zaoddraogende sporen
tot wied in 't rond
de grond lig klaor

't is veurjaor!
snaaiklokkies bluien
vogels fluiten en
lammer speulen
as eerste bodes
van het naaie leven

't is veurjaor!
wat 'n troost dat
nao 't verstaarven
't veurjaor ons
een naai begun
gaait geven

Oet de bundel: Elke dag

 

Media