Westerhuis, Ria (1959)

Ria Westerhuis is in 1959 geboren in Old-Avereest. (an de Overiesselse kaante van de Riest)
Zij gung in 1980 de gruppe over naor het Drentse De Wiek  en daor woont zij nou nog.

Ria schref sinds 2004 gedichten, liedteksten en verhalen in het Nederlands maar ook in de streektaal. Zij hef veur zanger-pianist Geert Jan Brader veur de cd Nog zoveul doen uut 2009 een koppel liedteksten eschreven.
Ria publiceert in diverse tiedschriften mor veural in het Drents literaire tiedschrift Roet.
Zij hef al een stuk of wat priezen ewunnen mit heur schrieverije under andern van de IJsselacademie te Kampen veur 't gedicht Ruis.

In april 2009 is Minnezinne bij uutgeverij Het Drentse Boek uutekomen. Dizze bundel mit erotische gedichten hef zij samen mit Delia Bremer emaakt. De schriefsters hebt der veul aandacht mit ekregen en bint der zölfs mit op de landelijke tillevisie ekomen. In een jaor tied bint der zowat duzend van verkocht.

 

In oktober 2009 is de cd Dichter bij elkaar uutekomen, waor vier Drentse gedichten en zes Nederlandse gedichten op staot. Ria les de gedichten veur begeleid deur gitarist Rob Zandgrond.

In 2008 hef Ria een script veur een toneelstuk eschreven.
Wieder organiseert en prissenteert ze veurdrachtaovends en vertaalt ze gedichten in 't Dreints.
Ze schref gedichten in opdracht.

 In 2011 hef Ria de tekst veur de Koppermaandagprent eschreven in het Nederlands, Drents en 't Erwees, een zölfbedachte taol. SteendrukkerAry Everhardus hef de prent edrukt.

In febrewari 2011 is de bundel Zundags goed uutekomen mit zeuventig neie Dreintse gedichten.
In 2013 kwam heur Nederlandstalige bundel Teugelloos uur. (Eigen beheer)
Nachtsleutel verscheen in 2015

Ria hef een eigen webstee: www.riawesterhuis.nl

Bij de daarde druk van Minnezinne is een cd verschenen waorop Ria Westerhuis en Delia Bremer heur gedichten uut Minnezinne veurdraagt.

 

Zundags goed

 

op de deure nog oen name

de kamer, stilleven

van oen deurleefd verleden

een dicht gerdien

de kachel kold

stoelen kil,

allent zo zonder oe

hier bij mij

voller en warmer

ieje

en oen gerei

stillegies pronkend

zundags goed eworden

bij mij

 

de Riest

 

zie hoe zij meandert

tussen grossprieten

en vergeet-me-nieten

stromend

van oost naor west

zich in bochten wringend

as een wellustige vrouwe

heur lief delend

met twei wallegies

die ze beide wil

aaien, wil smokken

met heur zute mond

hoe ooievaars drinkt,

kikkers eet

uut heur smalle schoot

de maone langs heur flaanken

scheert

op zuuk naor zunnevocht

en ik mien voeten wasse

bij ’t helder sterrenlocht

Uut: Zundags goed

 


Media