Veenstra, Ger (1946)


Ger Veenstra is geboren op 5 mei 1946 in Assen. Nao diensttied warkte hij in het onderwies onder andere in Dwingel en Börger. Hij gaf les in verschillende vakken en was decaan. In het begun schreef Ger veur zien eigen plezier Drentse gedichten. Zien inspiratiebronnen waren: de verhalen uut In het schemeruur bij
’t knappend vuur van J.J. Uilenberg en de radioverhalen van Mans Tierelier. Veenstra debuteerde in 2004 mit het gedicht Veurjaor in Maandewark/Oeze Volk. As keurnoot van het Huus van de Taol organiseert Veenstra diverse (voorlees-) activiteiten zoas Drentse poëzieaovenden en veurleessessies op basisschoelen in de Meertmaond-Streektaalmaond. As ambtenaar van de burgerlijke stand in de gemiente Börger-Oring trouwt hij op verzuuk in het Drents. Ger Veenstra is docent Drents en corrector bij het Huus van de Taol /Het Drentse Boek en jurylid bij het DAT (Drents Amateur Toneel).

In 2014 verscheen in eigen beheer de dichtbundel: Bochten wiest de stroom zien loop. Een aantal gedichten uut dizze bundel wordde ok in aandere bloemlezingen openeumen, waaronder As het er toe döt, een bundel met gelegenheidsteksten (2014, Het Drentse Boek).
In 2017 kwam Oet de schoel klapt uut (eigen beheer), een verzameling verhalen uut het onderwiesleven van Ger Veenstra

(Bron:Waor roet en blommen wortel schiet in 't veld. Geschiedenis van de Drentse literatuur 1945-2015 deur Henk Nijkeuter)

 


Oet de tied

Dood was heur genaodig
met een milde variant
zunder dat zie der arg in had
pakt’e zacht heur bij de hand

niet as een schok, weerspannig
het is meer een glieren west
overmand deur ieuwig slaopen
’n onheurbaore zucht nog op het lest

starven huuft niet slim te wezen
aj an het end van je bestaon
nao een riek, gelukkig leven
zachies oet de tied mag gaon


Uut: Bochten wiest de stroom zien loop (eigen beheer 2014)
Ok eplaatst in As het er toe döt (Het Drentse Boek 2014)