't Zuidlaordermarklied / Jan Naarding

't Zuidlaordermarklied

As Octobers daarde Dingsdag

Ankomp, zet in 't Drentse land

Alle manvolk, al de vrouwlu

Wark en zörge an de kaant.

't Kistentuug komp oet de kasten,

't Knippertien oet 't aol' kamnet;

Hèt döt d'allermooiste mus op,

Hie de pronkerigste pet.

Blinkend 't leerwark, blank het linnen,

Glad de paerde in 't gerei,

Giet 't in glorie an de riddel

As een wasschupswagen in Mei.

Rieg' an riegel ridt en rappelt

Aold en jong - Zuudlaoren veur -

Op de hulterige heide

't Hoge over, 't lege deur.

Böp en bes zit aal te nunern,

- Bluit de jonge tied weer in!

Vao holdt d' paerde drok in 'n draffien,

Moe giet 't machtig mooi nao 't zin.

d'Jongs die guntert, d'wichter giebelt,

Dreumt zuk al in 't drongst gedrang.

En vanzölm - eer ièn 't in d'weet hef -

Klinkt en klettert 't marktgezang;

Refrein:

Zuudlaoren, Zuudlaoren, Zuudlaoren hen 't mark,

Bij oes is Zuudlaoren as de zegel op 't wark.

Zuudlaoren bij de paerde, Zuudlaoren bij de wichter,

Al maakt z' alle beid' oes de buus aorig lichter.

Zuudlaoren spant de kroen. Al wo'k honderd jaor,

Ik moèt er hen 't mark! Ik zàl hen Zuudlaor!

Deur: Jan Naarding

Oet: Maandblad Drenthe oktober 1954.