De redactie van de populaire boeken/lezers-site Hebban.nl hef op heur site een overzicht maakt van spannende boeken die in de twaalf previncies van Nederland speult en Moord in het Mantingerveld van Tieme Woldman is daor iene van. De redactie beveelt telkens twei boeken per previncie an. Van 9 t/m 25 juni bint de spannende boekenweken. Misschien een reden um dit boek an te schaffen? 

 

Het neie boek van Ger Veenstra het Oet de schoel klapt. Ger Veenstra is een echte onderwiesman. Gien wonder dus dat hij de mooiste en de grappigste verhalen uut zien onderwiestied opeschreven hef. Allewel hiel veul meinsen situaties herkennen zult van heur eigen schoeltied, zult de verhalen veur meinsen uut Börger en umstreken hielemaole bekend veurkomen. Ie kunt het boek bij Ger zelf bestellen (0599 235398). Het kost 9,95.

Op zaoterdag 29 april prissenteerde Leny Hamminga heur mininovelle Lena. Het eerste exemplaar gaf Leny an heur tantje Aaltje. Tijdens de prissentatie roemde veurzitter van het Huus van de Taol, Anne Doornbos, de gave van Leny Hamminga um een familiegeschiedenis zo beknopt en indrukwekkend weer te geven.Der bint vieftig exemplaren van het boek edrukt. Het boek kan allent via het Huus van de Taol aneschaft worden, via de webwinkel of in het kantoor an het Raadhuisplein in Beilen. Zolang de veurraod strekt.

Schriefster Leny Hamminga ut Taarlo prissenteert op 29 april heur neie boek Lena. Dizze mininovelle in het Drents vertelt de geschiedenis van Lena. Leny Hamminga beschref in dit boek het opgreuien van een kwetsbaar maagie naor een zorgelijke jonge vrouw. Het leven is ok lang niet gemakkelijk veur heur; ze is zelf ziekelijk en heur man rak warkloos. Leny is der in eslaagd um de familiegeschiedenis in ongeveer vieftig pagina's in een sfeervol beschreven tiedsbeeld neer te zetten. 

Roelie de Weerd wun mit heur verhalenbundel Waorum geleuft gieniene mij nou? de Streektaalpries van het Dagblad van het Noorden. Veur de muziek gunk de pries naor Erwin de Vries mit zien album De Noodzoak. De pries wordde veur de twaalfde keer uutereikt. Alle literatuurnominaties op de korte lijst kwamen uut Drenthe via het Huus van de Taol. Wij fielsieteert Roelie van harte mit heur pries!

Op vrijdag 31 meert prissenteerde Rouke Broersma bij het Huus van de Taol in Beilen zien boek Drentse Letteren, het verhaal achter Scheupers van de Taol, 1837-2016. Dit boek mit achtergrondinformatie over de Drentse literatuur, is niet allent veur de liefhebber van de Drentse schrieverij, maar veural ok een boek veur gebruuk bij cursussen en in het veurtgezet onderwies. Joana Da Silveira Duarte, lector Drents, Duits en meertaligheid an de Hogeschool Stenden en verbunden an de RUG, nam het eerste exemplaar van de uutgever in ontvangst.

Het boek Koloniekak van Mariët Meester is 8500 keer verkocht! De viefde druk is zojuust binnenbracht in het Huus van de Taol. Het boek dat in 2012 uutkwam is slim populair. Dat komp deur de boeiende wieze waorop de schriefster het leven in het gevangenisdorp beschref. Momenteel wordt mit groot succes het toneelstuk Koloniekak (Script en regie: Jos Spijkers, productie Stichting ‘t Zwerk) opvoerd bij Coco Maria, in het olde koetshuis van de vroggere strafkolonie en rijkswarkinrichting Veenhuzen. Ie kunt daorveur kaorten bestellen. HEt boek is verkriegbaar in de Nederlandse boekhandels kopen of in de webwinkel van Het Drentse Boek.

In 2001 stopte Dick Blancke mit zien wark as prissentator bij Radio Drenthe en vertrök mit zien man Ron Vos naor Zuud-Frankriek. Veul mensen versleten heur veur twie ezels .... Want wie verruilt nou een vaste baan en een mooi huus veur een ongewisse toekomst in Frankriek? Maar volhardend as ezels probeerden ze zich an te passen en gung ze an de slag mit het verbouwen van een huus veur de verhuur veur vakantiegangers. Dick schreef zien ervarings op en zo onstund dit boek met een Drentse kiek op het Fraanse leven. En dat döt hij in het Drents, want dat is de taal die het dichtst bij hum stiet as hij an het schrieven is. Op vrijdag wordt het boek prissenteerd en is dan verkriegbaar in de mieste Drentse boekhandels en via de webwinkel van Het Drentse Boek.

Pagina 6 van 45