Doe mit an een busreis langs biezundere plekken die verbunden bint an Drentse schrievers. Literatuurkenner Harm Jan Lesschen nemp op vrijdag 25 mei  deelnemers mit naor de mooiste plekkies en verhalen uut de Drentse literatuur, van de 17e eeuw tot vandaag de dag. Het Drentse landschap en veural de Hondsrug was en is nog aal een inspiratiebron veur veul Drentse schrievers en de tegenstelling tussen het zaand en het veen hef dudelijk zien sporen achterelaoten in de Drentse literatuur. Naost veul informatie over taal en geschiedenis wordt deelnemers trakteerd op pakkende poëzie en proza, zowel in het Drents as in het Nederlands.
 

Op zaoterdag 21 april prissenteerden Jan Germs en Jans Polling heur verhalenbundel Jan, Jans en de fiets. Um het neie boek an te priezen gungen Jan en Jans op de fiets deur Drenthe (en een klein stukkie Friesland). Zij begunden bij Reiber in Dwingel en gungen vandaor uut naor Appelscha (Kramer Fietsservice). Vandaoruut gunk het op Annen (Roossien Tweewielers) an en het eindstation was Rijwielzaak Egbert Egberts in Börger. Hier was de officiële prissentatie. Naodat de twee schrievers elk twee eerste exemplaren uutdielden en allebei een kostelijk verhaal uut het boek vertelden, wordde het glas eheven op het neie boek. Wie het boek wil kopen kan bij de Drentse boekhandels terecht of bij de webwinkel van Het Drentse Boek www.drentheboeken.com 

Het Light Verse Collectief, bestaonde uit Rob Boudestein, Ben Hoogland, Gezienus Omvlee en Ton Peters, hef mooie plaatsen in beeld ebracht in Ollekebollekes; korte grappige gedichties mit een ritme dat klinkt as ólleke-bólleke, een driekwartsmaat asoj een walsie heurt ....Koninklijk misstapje, mannen in oliegoed, lensvormig lijnenspel, langnietnaorhoesgezang. Zomaar wat zaken die in dit bundeltie an bod koomt, zowel in het Nederlands as in een Nedersaksische variant. De titel? Binnenkort Uitverkocht! Der gebeurt veul in Drenthe, Grunning en Friesland!. Zoveul moois dat de meuite weerd is um veur de eeuwigheid vaste te leggen; het kan ja zomaar verdwenen wezen! Binnenkort uitverkocht gegevens objecten


In zien woonplaots Hollandscheveld hef Rieks Siebering zien neie gedichtenbundel 'Verjaag met mij de rikken van mien laand' laoten zien. Het eerste exemplaar kreeg Klaas Smid. Hij was vrogger Wetholder in de gemiente Hoogeveen. Nou is e burgemeester van Noordenveld.
Het was een schiere prissentatie in dörpshuus 't Anker in Hollandscheveld.

De Drèentse bundel Mien kiek op de wereld is de tweide bundel van Henny Bouwman, Henderkien. In de bundel staon gedichies en verhaolties over alledaogse dingen. Heur eerste bundel Leven is leefde kwam in 2016 oet. Alle mooie reacties van mèensen oet Nörg, mor ok oet aander plaotsen in Nederland zoas Amsterdam, Zwolle en Grunningen, hebben heur anmooudigd deur te gaon met schrieven. En noe lig de tweeide bundel der al. Henny haolt inspiraotsie oet kleine dinkies, die heur opvallen. Familie, natuur, muziek, leeifde binnen onderwarpen, die aalgedurig veurbijkommen in heur gedichten.Zundag 11 meert is ’t booukie prissenteerd bij café Zwaoneveld in Nörg. Het booukie “Mien kiek op de wereld” is te koop bij MariKari in Nörg of te bestellen op tel.nr. 0592 - 613812.

Vrijdag 9 meert kuj naor de Literaire Hemel in café de Amer in Amen veur een interessant programma. Albert Haar en Annette Timmer interviewen drie gasten: Mariët Meester over Tribune van de armen -Over leven en vrijheid in Andalusië, Jannie Boerema over Leeive lieve Eva en Mathijs Sanders over Hugo Claus (1929-2008). Informatie over risserveren kuj in de folder vienden.

Bij de nominaties veur de Streektaalpries van het Dagblad van het Noorden veur 2017 hebt de Drentse inzendings een belangriek aandiel. In de categorie proza en poëzie bint Leeive Lieve Eva (Jannie Boerema), Drentse Letteren (Rouke Boersma) en Lena (Leny Hamminga) deuredrungen tot de leste drie. Alle drie de boeken bint uutegeven bij Het Drentse Boek. Het boek Lena is allent nog as e-book te bestellen via de websites van enkele Drentse boekhandels ( Van der Velde Assen, Riemer Barth, Meppel Bruna , Read shop, en Bol.com In de categorie cd/dvd bint naost de Drentse dvd Daor stiet je fiets (Harm en Roelof) uut het Grunningse laand nomineerd: de veurstelling Menalda vetes van theatergroep Waark  en Noar de volgende ronde van Krzysztof Groen. De priesuutreiking is op zundag 15 april in theater vanBeresteyn in Veendam en zal um twee uur begunnen.Veur het eerst zal der ok een publiekspries uutereikt worden. Op de site van het Dagblad van het Noorden kuj binnenkort fimpies van de genomineerden bekieken en oen veurkeur kenbaar maken. De jury van de Streektaalpries bestiet uut Eric van Oosterhout (burgemeester van Emmen), Jannie Kuipers (van de bibliotheek Emmen), Geesjen Doddema-Heidema (redactie Toal en Taiken), Ingeborg Nienhuis (publiciste in het Grunnings) en Tonko Ufkes (veurmalig streektaalfunctionaris en schriever). 

Het was op 5 febrewari precies 100 jaor eleden dat Peter van der Velde geborden wordde in Vlagtwedde. Het Peter van der Veldejaor wordde zaoterdag 3 febrewari feestelijk lösedaone deur Wetholder Alex Wekema van Noordenveld. Die maakte bekend dat der een straot in Roon vernuumd zal worden naor de Drentse schriever. De Peter van der Veldelaan komp vlak bij zien olde huus in Roon te liggen.

 
Pagina 2 van 45