Zestien neie Drentse kinderliedties in Jamero

27 okt 2011

Op woensdag 26 oktober 2011 hef de prissentatie west van het taol-meziek-pakket Jamero. Tegen twee uur was het die dag gezellig drok in de aula van Stenden Hogeschool in Emmen.

Der waren u.a. twei kinderkoren (een combinatiekoor van De Lisdodde en De Vlonder oet de Rietlanden in Emmen en kidskoor Woudklank oet Roon), die samen met zangeres Martijje! een diel van de prachtige Drentstaolige liedties heuren leuten. Gedippeteerde van cultuur, de heer Rein Munniksma, nam het eerste exemplaar in ontvangst.

 

De zestien neie Jamero-liedties staot op twei manieren op geluudsdragers. Ien maol met tekst én meziek en een maol met allén de meziek. Dizze karaoke-versie kan mooi gebroekt worden as de kinder de liedties goed kent. Ien van de liedties hef as titel Jamero en dat is metien de naam veur het hiele preject worden. Wieder is der allerhande educatief materiaal bij maakt. Dizze lesstof is deur Marinus Scholten geschikt maakt veur gebroek op het digitale schoelbord; daorum is der ok een dvd an het pakket toevoegd. De liedteksten en het educatieve materiaal staot wieder in een mooi lesboek. Jet de Wilde hef prachtige illustraties veur het preject maakt.

Al met al is het Jamero-pakket hielemaol worden waor de samenstellers Martijje Lubbers, Jan Kruimink, Marinus Scholten en Jan Germs op hoopt hadden. Zowal wat oetvoering as inhold angiet, is het gewoon een alderbarstend mooi preduct worden. Dat de makers dat vindt, is vanzölf niet zo vrumd, maor het was ok de miening van alle anwezigen bij de prissentatie.

Alle basisschoelen in de previncie Drenthe kriegt binnenkört een bezuuk, waorbij een Jamero-pakket anbeuden wordt. Ien exemplaar kriegt de schoelen gratis; veur € 30,00 kunt ze zuch der meer van toestellen. Die pries geldt ok veur aandere belangstellenden. Veur € 30,00 kuj Jamero bestellen. Dan kriej het boek en een deusie met de twei cd’s en de dvd in hoes. En dan… zingen maor!!! In het Drèents!!!

Veur meer informatie en bestellingen kuj contact opnimmen met het Huus van de Taol (Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. of 0593-371010). Van ien november of, kuj het pakket trouwens ok kopen in oeze kiepshop. Kiek daorveur op www.kiepshop.nl. En tot slot - aw toch gangs bint met het deurverwiezen naor websteden - je kunt meer info vinden op www.jamero.nl.

mt_gallery