Daniël Lohues hef een neie cd. Vanof 2 meert is Vlier te koop. De liedties op dizze nei cd gaot over thuuskomen, verleuren liefde, Nedersaksisch, religie, vriendschap en familie. Luustern kan via daniellohues.lnk.to/Vlier

Margaretha Kleine hef een neie single. Zowel de tekst as de muziek van De Planeet hef Maragaretha zelf eschreven. Hiel verrassend is de rap van Kuò die in het nummer is vervlöchten.

Op vrijdag 23 febrewari is op 76 jaorige leeftied Jannie Karst uut de tied ekomen. Jannie Karst wordde begun jaoren tachtig samen mit heur zeune René bekend as het duo Karst.Jannie schreef alle teksten veur het duo en dee dat miestal in heur geliefde Drentse taal. Veul bekendheid kreeg het duo mit heur Kerstoptredens in de Tamboer Kerst mit Karst, Wij wenst de familie Karst hiel veul starkte. In de Tamboer in Hoogeveen wordt woensdagavond vanof 19.00 uur een openbare herdenkingsbijeenkomst onder de name Nog één keer applaus veur Jannie Karst eholden.


Het Drèents Liedtiesfestival 2018 (DLF18) komp der an! Het grootschaolige liedtiesfestival wordt veur de zeuvende maol organiseerd met as doel het schrieven, oetvoeren en vastleggen van neie Drèentstaolige kwaliteitsmeziek. De organisatie -Stichting REUR- rop alle mezikaanten en tekstschrievers van Drèentstaolige meziek op um liedties in te sturen.

Alle basisschoelen in de Aa en Hunze en een stuk of wat schoelen in Assen gaot an de slag mit de liedties van Het Jaor Deur en Jamero. Eind maart wordt der uuteindelijk drie mitzingconcerten organiseerd. Dit project is opezet in het kader van het Kunstmenu dat is organiseerd deur Akke Feenstra samen mit het Huus van de Taol en de gemiente Aa en Hunze. Op 23 jannewari is der een workshop veur leerkrachten samen mit Martijje en Marinus Scholten. In dizze workshop wordt o.a. aandacht besteed an de Drentse uutspraak, an eigen zangholding en zangtechniek en der wordt didaktische tips egeven. Eigenlijk bint de mitzingconcerten ericht op kiender uut de groepen 3 en 4, maar het is ebleken dat de liedties uut de bundels ok zeer geschikt bint veur aandere leerjaoren.

Het kan niet op veur Isa Zwart! Wun zij veurig jaor het Drents Liedtiesfestival mit Mamme see, in december wun zij de publiekspries bij Het Europees Songfestival veur minderheidstalen en as klap op de vuurpijl hef zij dit weekend de culturele pries van Emmen ewunnen! Wij fielsieteert Isa van harte mit dit mooie resultaat!

Nao Heb lief en leef (2008) en Op de vleugels van de wind (2014) komp der een nei muziektheaterstuk. In september 2019 wordt De Toorn van Thunear opevoerd op landgoed De Klencke. Initiatiefnemers Harm Dijkstra (bedenker en schriever), Jan Kruimink en Gerrit Hegen bint der barre drok mit bezig um het stuk op de planken te kriegen. Der is een speciale stichting in het leven eroepen,Ter Klinke. De stichting hef as ondertitel Culturele Courazie en Dieverdaotsie; zij hebt de Drentse streektaal hoog in het vaandel. Het wordt een groot spektakel, waoran veul acteurs en figuranten zult mitdoen. Het stuk zal zich ofspeulen langs de waterkant an de Mosterddiek op De Klencke.

Het Europees Songfestival veur minderheidstalen is ewunnen deur de Zwitser Tumasch é. Zangeres Isa Zwart uit Emmen, die as mitdeed namens het Nedersaksisch, hef de publiekspries ewunnen. De 17-jaorige Isa Zwart zung gisteraovend in het italiaanse Udine heur liedtie Mamme See, waormit zei dit jaor het Drents Liedtiesfestival wun. Der waren nog zeuven aandere finalisten. Der wordde ezungen in het Baskisch, Welsh, Friulisch, Occitaans, Retro-Romaans, Bretons, Galicies en in het Nedersaksisch dus ... In het NRC een interessant artikel over dit festival.

Pagina 2 van 16