Het mag dan wal zo weden dat oeze previncie zuch al jaoren inzet veur behold en bevördering van het Nedersaksisch, in de praktijk blek toch dat het in de Statenzaal ‘not done’ is um tiedens officiële vergaderingen Drents te praoten. Het is zeker niet zo dat het niet mag, maar het gebeurt gewoon niet. Wal raar aj je bedèenkt dat er nao de vergadering wal weer gesprekken in de streektaol veurbijkomt!

Bij het Huus van de Taol biw der dus gloepends wies met dat de statenfracties van PvdA, CDA en Forum veur Democratie een motie indiend hebt um in de Meertmaond Streektaolmaond stil te staon bij de streektaol. Umdat ze het mooi vindt um het Drents en aandere streektaolen wat meer te heuren in de Statenzaal. Streektaol is immers een belangriek diel van de trots en de identiteit van de inwoners van Drenthe.

De leden van het Drents Parlement hebt op 16 december stemd op de motie en die is met een roeme meerderheid van stemmen annummen. Net as in Grunning en Overiessel trouwens.

Bi’j beneid naor de statenvergadering van meert? Het Drents Parlement zendt dizze live oet met geluud en beeld, dus dan is ’t net oj der zölf bij bint! En de vergadering is ok terug te kieken op dizze pagina. Op 24 meert um 09.30 uur begunt de vergadering!