Europees Parlement stemt veur betere bescherming minderheidstaolen

Goed neis oet Brussel! Het Europees Parlement hef op dunderdag 17 december met grote meerderheid stemd veur het Minority SafePack Initiative (MSPI), een burgerinitiatief veur meer andacht veur kleinere taolen. Umdat de Europese Unie de leste jaoren gien beleid meer hef wat minderheidstaolen angiet was minderhedenorganisatie Federal Union of European Nationalities (FUEN) met het initiatief kommen,

Meer as 1,1 miljoen EU-burgers hebt het initiatief undertiekend. Dunderdag stemden 524 Europarlementariërs veur en 67 tegen. Daornaost waren der nog 103 die zich ontholden hebt van stemming.

Deur de anname van het burgerinitiatief möt de EU nou opnei an de slag met minderhedenbeleid. De dudelijke meerderheid wordt zien as een signaal an de kemisie en lidstaten dat er concrete maatregeln verwacht wordt. Het Europees Parlement stelde gister dat er meer andacht kommen möt veur minderheidstaolen in het underwies. Ok möt er meer positieve actie kommen in de cultuursector en in openbare diensten um het oetstarven van die taolen tegen te gaon.

Minderheidsgroepen komt aal meer in de verdringing, erkent ok het EU-Parlement. Heur taolkundige rechten möt beter beschermd worden en taolgemienschappen meer respecteerd.