Oeze old-directeur gung met de FC Emmen-bus deur de pervincie um van de vrijwilligers en aandern ofscheid te nemen. In veer plaotsen was een Drèents pergramma in mekaor zet. In Assen, in kunstplaza Schurer van Vanderveen, kreeg Jan van bestuursveurzitter Emko Dolfing de erespeld van het Huus van de Taol. Jan zien vrouw Margareth speldt hum het eretieken coronaproof op.

Het ofscheid van Jan gung aans as eerder docht. Gien feestaovend met vrijwilligers. Gien officiële receptie met veul handen schudden. Veur Jan zag het der naor oet dat e met stille trom met pensioen gaon zul. In coronatied kuj ja gien gewoon ofscheid hebben. Dus wur der boeten Jan um wat aans regeld: ‘Roet 66’; een ofscheidstoernee deur de pervincie met de FC Emmen-bus.

Op vrijdag 4 september 2020 stopt um 9 uur de FC Emmen-speulersbus veur het huus van Jan Germs. Even laoter is e vol met vrouw, kinder, bestuur en metwarkers van het Huus van de Taol. De eerste stop is het FC Emmenstadion. Daor zit 60 man coronaproof naor een pergram over meertaoligheid te kieken. Streektaolambassadeur Annemiek Drenth zingt en Jan mag zölf op doel schieten. Handen schudden is der niet bij. De kedo’s wordt in een kedokist legd.

En zo is het ok bij de Bospub in Dwingel. Het thema daor is schrieverij. Gerard Nijenhuis en Anne Doornbos hebben mooie woorden veur Jan. En Martijje hef een lied veur Jan schreven. In Assen stiet gedippeteerde Cees Bijl, burgemeester Eric van Oosterhout en bestuursveurzitter Emko Dolfing klaor. 50 vrijwilligers en aandern ziet dat Jan Germs de erespeld van het Huus van de Taol krigt. Zien vrouw speldt dizze bij Jan op.

De leste stop is um vier uur in Vries. Het thema is hier ‘op de plaanken’. Achter de kerk warkt Jan zich in het zwiet. Hij is ‘Geräuschemacher’ in het deur Leny Hamminga schreven heurspel over het leven van Jan. Zangeres Davine zingt met begeleiding van Tony Hoyting ‘La Bicyclette’.

Dizze dag was veur Jan ien grote verrassing: “Mörgen gao ik maor ies alles wat der veurbij kommen is opschrieven. Stief bedaankt!”

Jan Germs is nao achttien jaor leiding geven an Drentse Taol / Huus van de Taol nou met pensioen. Verleden jaor hef e zien taoken al an Renate Snoeijing overdragen.