Andries Middelbos, van kraantenbezörger naor schriever

Andries Middelbos oet Gasselternijveen hef zien eerste boek klaor. In Knooien in ’t duuster beschref e zien belevenissen in de vrogge mörgen as e de kraanten in de bus döt.

In het Huus van de Taol in Beilen waren vrijdag 17 juni zu’n virtig man bij de prissentatie van het eerste boek van Andries Middelbos. De schriever gaf het eerste exemplaar van zien boek Knooien in ’t duuster an zien vrouw Dinie. In 37 verhalen lat Middelbos zien wat een dagbladbezörger zoal beleeft in de vrogge uurties van de dag.

Bij de prissentatie was nóg een Andries Middelbos. Oetgeverij Het Drentse Boek vun het een schier idee as Andries Middelbos, de schilder oet Hoogeveen, de umslag veur Knooien in ’t duuster maken zul. En zo is ’t ok gaon. Het mooie was dat de schriever en de schilder mekaar bij de prissentatie veur het eerst de haand schud hebt. Andries Middelbos de schilder hef ok schilderijen metnummen en die bint vanof nou te bekieken in de zalen van het Huus van de Taol, Raadhuisplein 1 in Beilen.

Het boek is veur € 14,95 te koop in de boekhandel en de webwinkel van het Huus van de Taol.

Andries Middelbos (links: de schriever) ontmoet veur de eerste keer Andries Middelbos (rechts: de schilder)