Het Mooiste Drentse Woord van 2021 is bekend

Is het gaorenklopper, gloepends, kopstubber, vernuvern of toch boezig worden? Het Mooiste Drentse Woord van 2021 is bekend!

Wij hebt samen met RTV Drenthe ok dit jaor weer naor het mooiste woord oet oeze streektaol zöcht. En dat was veur veul liefhebbers van het Drents reden um een woord in te sturen: umdebij 500 reacties kwamen der in Beilen binnen tussen 3 en 10 december.

Van alle inzendingen weurden vief woorden het vaakst instuurd: kopstubber, boezig, gaorenklopper, vernuvern en gloepends. Nao een spannende verkiezingsweek met meer as 1200 stemmen bleek gaorenklopper de mieste stemmen te hebben en is daormet de winnaar van de titel ‘Mooiste Drentse Woord van 2021’.

Een ‘gaorenklopper’ was vrogger een ambacht. Linnen kettingdraoden mussen varfd worden, veurdat ze op het weefgetouw gungen. In het varfbad bleven die draoden allemaol an mekaar plakken. Dus as de gaorens dreug waren, mussen ze nog lösklopt worden. Deur der hard op te slaon, kwamen de draoden weer lös van mekaar. Dat was gloepends smerig wark, grootkaans dat dat deur de minst loze warknimmers daon weur. Het woord ‘gaorenklopper’ wordt vandaag de dag dan ok gebroekt veur ‘sufferd, lummel, onbenul, domme, onhandige, vreemde maar ook eigenwijze vent, halve gare of grappenmaker’.