Schotse hooglander Mini kik met tiedens boekprissentatie Vief Liefdes

Schriever Klaas Koops gef eerste exemplaren van zien neie bundel an de prissentatoren van De literaire Hemel, Annette Timmer en Joep van Ruiten.

In de wei bij zien hoes in Schipbörg hef Klaas Koops drie Schotse hooglanders lopen. Ien van de biesten hef van de schriever liefdevol de naam Mini kregen. En zij stiet veuran bij de boekprissentatie van de bundel Vief liefdes. Het is een dreuge dinsdagmörgen in december as Klaas Koops drie gasten ontvangt: Annette Timmer en Joep van Ruiten van De literaire Hemel en Baukje Bloemert van oetgeverij Het Drentse Boek van het Huus van de Taol.

In Vief Liefdes beschref Koops in gedichten en slim körte verhalen wat hum bezigholdt en niet van hum of zetten kan. Hij nuumt dat zien liefdes. De gedichten bint beschouwend van aord, de verhalen getuugt van verwondering over wat hie in de wereld tegenkomp.
Zien op het eerste gezicht ienvoudige taol wet de lezer over te halen stelling te nimmen en te overwegen hoe die der zölf in stiet.

En as de Schotse hooglanders hun voer hat hebt, overhandigt Klaas Koops het eerste exemplaar van zien boek an de prissentatoren van literair café De literaire Hemel. Joep van Ruiten hef as dank een column veurbereid. En ok Annette Timmer hef een schiere speech veur Koops. En as Baukje Bloemert de schriever met een bos bloemen feliciteerd hef, mag het boek de wereld in. Vief liefdes van Klaas Koops is nou te koop in de Drentse boekhandels en in de webshop van het Huus van de Taol.