In de zeuvende oflevering van de podcastserie Praot Drents met mij een gesprek met schriever/dichter Ria Westerhuis.

Ria is geboren in Overiessel en vindt zuchzölf daorum ok niet hielemaol Drents: ‘Ik nuum mijzölf altied een kind van de Riest. Ik bin nog steeds met de voeten geworteld in Overiessel, maor ik lig met de kop op ’t kussen in Drenthe en mien lief zwevend boven de Riest.’

Ria was hielemaol niet van plan um schriever te worden, maor een bijienkomst van Taal an Taofel inspireerde heur um te gaon schrieven.

Ria schreef undermeer de erotische bundel Minnezinne, samen met Delia Bremer, en daor kreeg ze veul reactie op. Ok as ze dermet op het podium stund. Veural van mèensen die zeden: ‘As dit poëzie is, dan vind ik poëzie wel leuk, dan wi’k nog wal ies vaker komen kieken.’ Zie vertelt ok hoe heur zeun op dit wark reageerde en over heur neie bundel die der zunder de coronapandemie niet kommen was.