We bint bliede daj over de zul stapt bint um hier binnen te kommen. Nou kuj hen boeten kieken. Nim ie wat slaot met? Beter dat ie dat opvreet dan een toggel sikken.
Met dizze zin is de buurtsuper ‘Lekker Makkelijk’ in Grol een paor week leden lös gaon met een streektaolactie.
De streektaolambassadeur en streektaolvrijwilligers in de gemiente Aa en Hunze probeert op verschillende manier um de streektaol under de andacht te brengen bij de bevolking. Veur de buurtsuper ‘Lekker Makkelijk’ in Grol warkt ze met an wat Groller Bertus Reinders oetdacht hef en deur Groller wieder oetwarkt is. Zeuven week achter mekaor wordt der in de winkel een zin in het Drents ophangen. De bedoeling is dat klanten de juuste Nederlandse vertaoling op een papiertie schrieft en bij de kassa inlevert. Nao elke week wordt een winnaor bekend maokt en nao zeuven weken een totaolwinnaor.
Het mag dudelijk wezen dat der hiel wat biezundere antwoorden binnenkommen bint. Hierbij gaf het woord “toggel” de mieste problemen. Het is wel hiel arg helder worden dat aj het Drents niet kent, je de Drent wel iens hielemaol verkeerd begriepen kunt. En aj het wel machtig bint is dat wat um rekening met te holden.
