Online veurlezen in de Meertmaond Streektaolmaond

Meert is altied dé maond van veurlezen op de basisschoelen. Oeze vrijwilligers bezuukt de schoelen en brengt daor de Wiesneus. Dat giet dit jaor even wat aans: via YouTube en  www.wiesneus.nl kunt meesters en juffen tóch een Drents verhaal de klas in halen met veurleesopnames in verschillende varianten Drents.

De Wiesneus, het tiedschrift veur basisschoolkinder van 4 tot 12,  hef dit jaor het thema In Beweging en wordt wél deur de vrijwilligers bracht. Het stiet weer boordevol verhalen, gedichten, liedties, spellegies, puzzels en een lekker recept. De prachtige illustraties bint van Natascha Stenvert, Anneke Bloema en Hilde Koop.

Wiesneus is een mooi veurbeeld van Nedersaksische samenwarking: ok kinder in Grunningen, Overiessel en de Achterhoek kriegt een Wiesneus in de eigen streektaol. En daorbij komt ok de liedties Stoplocht en 1234-Daogse  in de streektaolen van die provincies oet!

Nei is dit jaor de lesbrief veur leerkrachten, zodat elke dag van meert het Drents een plekkie in het lesprogramma kriegen kan. De lesbrief en de link naor de filmpies kuj allemaol vinden op www.wiesneus.nl . Onder de tegel Veur olders en lesgevers staot de links.