Dichters zöcht veur loketpoëzie

8 feb 2017

Op 1 meert besteeit ’t Huus van de Taol tien jaor en daorom hew op zaoterdag 4 meert een jubileumfeest, een Lös Huus in ’t gemeeintehoes in Beilen. Elkeneein is vanzölf van harte welkom om even an te kommen en te kieken waw die dag almaol dooun. Eein van de programma-onderdelen op 4 meert is Loketpoëzie.

Wat is loketpoezie?

Op ’t Lös Huus treden Drèentse schrievers, dichters en muzikanten op, mor wij willen ok onbekendere Drèentse dichttalenten ies an het woord laoten. Hoou gaow dat dooun? Het Huus van de Taol zit in ’t gemeeintehoes in Beilen en op de dag van ’t Lös Huus mug wij ok de hal van ’t gemeeintehoes gebruken. In de hal van ’t gemeeintehoes binnen vanzölf loketten, die hej ja in een gemeeintehoes. Het liekt oous een mooi idee om Drèentse dichters achter een loket te zetten. ’t Publiek kan dan an ’t loket langes en krig een gedicht te heuren. Wat kriej dan? Dan kriej èengelijk een heeile intieme veurstelling.

Wij hebben vanzölf al een stuk of wat dichters benaoderd, mor wij hopen dat der ok neie, onbekende Drèentse dichters metdooun willen. Eein miljoen Nederlanders schrieven heur gedaachten wel ies op. Daor zitten vast ok een koppel Drenten bij. Wij hopen dat die talentvolle, onbekende Drèentse dichters ies veur ’t locht kommen willen met heur gedichten. Wij dèenken dat ’t tienajorig jubileum van ’t Huus van de Taol op zaoterdag 4 meert een mooi moment is om dat te dooun.

Wat moej dooun aj metdooun willen an loketpoëzie? Stuur tweei van joen mooiste, beste, verdreeitigste of ‘gemeeinste’ gedichten veur zaoterdag 25 feberwaori op an ’t Huus van de Taol; leeifst per mail: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. , mor met de post mag ok, Raadhuisplein 1, 9411 NB Beilen. Zet der wel even Loketpoëzie bij.

Het muggen gedichten weden van veer regels, mor ok van aacht of zestien. Het mag een limerick weden of een rondeel, mor ok een sonnet of een vrij vers. Dat mug jij as dichter(es) heulemaol zölf weeiten. Het gedicht mag overal over gaon; over leeifde, dood of vergankelijkheid, mor ok wel over politiek of over joen mooie, neie auto. De veurbereidingsgroep die ’t jubileum organiseert bekik alle gedichten en neugt de beste deelnemers om in ’t programma Loketpoëzie op te treden op zaoterdag 4 meert.

Ok aj niet oetkozen worden om op te treden kriej bericht. En elkeneein is vanzölf van harte welkom om op 4 meert te kommen kieken naor de neiste Drèentse dichters en dichteressen.