Drenthecursussen oferond

5 apr 2017

De Drenthecursussen van dit seizoen bint zowat klaor. Der is nog ien cursus gaonde in Gastern. In de ofgelopen weken bint de Drenthecursussen in Nijevene, Beilen, Börk en 't Ollaanseveld oferond. De achtwekige cursus wordde deur de cursisten arg op pries esteld. Ien van de cursisten van 't Ollaanseveld maakte der zelfs een gedicht over. Ie kunt wel naogaon dat de docenten daorover barre te spreken bint.




Vanaovend was de leste keer

van oonze Drèentse les.

Wij hebt barre veule eleerd

van dingspils, karpels en de nes.

 

Ok wordde oons uutelegd

hoe we de woorden schrieven mussen.

En dat der in Drenthe zeuven varianten bint,

dus der zit altied wel wat tussen.

 

Inmiddels weten wij nou ok:

wij praot hier aans as in Dwingeloo.

Daor Klaetert het Waeter in de Glaezen,

hier dèenke wij dan “Wàt een show”.

 

En aj het hebt over evenpies

daj dan niet eempies magt schrieven.

Dat viene wij wel wat jammer

en ok wel wat overdrieven

 

Mèensen mit piene in de balg

boekzeerte of piene in d’hoed.

Dan weten wij nou allemaole

die mèensen die veult zich lange niet goed.

 

En kleine kiender die as blèert

die viene wij gloepens irritàant.

Mar as d’r ientie zachies rèert

Is ‘t zielig en is der vaste wat an de haand.

 

Muziek was der ok vake te heuren

Klein Rieksie en Roel Reijntjes waren ok van de partij.

Een mooi verhaal over Vrouw Koetje

en ok Daniël Lohues fietste nog evenpies veurbij.

 

Zoaj wel markt hebben wij

in de les ja veule opesteuken.

En ok de Nei Drenten weten nou

hoe de woorden wordt uutespreuken

 

Veur mijzölf vien ik het mooi

(en dat was ok mien belangriekste plan).

Dat ik nou niet allènt Drèents kan praoten

mar ok in het Drèents schrieven kan!

 

Yvonne Bijl-Hooyer