VEUL BELANGSTELLING CURSUSSEN

Het Huus van de Taol organiseert al jaoren de Drenthecursus, een cursus van aacht aovends over de Drentse taol, cultuur en geschiedenis. De cursus kost maor 55 euro en daor hej ’t cursusboek veurgeefs bij. De leste jaoren doet der an de cursussen van het Huus van de Taol aal meer mèensen met. Zie wilt allemaol meer weten over de Drentse taal en cultuur. 

Een jaor of wat leden hef het Huus van de Taol het cursusmateriaol verneid met neie Drèentse liedties en Drèentse schrieverij van de leste jaoren. Het cursusboek hef ok een neimoodse oetstraoling kregen. En sinds een jaor of twee bint der aal meer cursussen. De cursussen bint interessant veur echte Drenten mor ok veur mèensen die nog maor net in Drenthe woont. Juust een gemengde groep van neikommers en echte Drenten maokt zu’n cursus interessant. An een cursus kunt tussen de 10 en 16 mensen metdoen.

Onderwarpen die an de orde komt, bint vanzölf de Drentse taol en alles wat daor bij heurt zoas:  woordenschat, oetspraok en grammatica, maor der huuft gien saaie rijgies woordties of vervoegings leerd te worden. Der wordt ok oetgebreid stilstaon bij de Drentse literatuur en de Drèentse meziek. 

In oktober – november 2018 staot der Drenthecursussen op de agenda in de plaotsen Roneresch, Beilen, Börk (Westerbork), Vaalt (Valthe), Rune (Ruinen) en op Erica. Veur goenend die de Drenthecursus al daon hebben, is der de vervolgcursus Dieper deur Drenthe, die holden wordt in Beilen en Nijevene. Aj geïnteresseerd bint in de spelling van het Drèents kuj metdoen an de spellingcursus in Dwingel. In ’t Broekhoes in Baoling kuj een körte cursus van drei lessen volgen: de Kom in de Kunde-cursus.

Woj in je eigen woonplaots een cursus organiseren? Bel of mail dan even met het Huus van de Taol. Anmelden veur ien van de cursussen kan via telefoonnummer 0593-371010 of via e-mail: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. . Veur meer informaotsie kuj ok contact opnemen met het Huus van de Taol.