Poëzieweek

De Poëzieweek is verleden week dönderdag begund. Wij plaotst aal daogen in de Poëzieweek een gedicht van een facebookvriend.

------------

Ode an Long - Tea Nijnuis

hou kunnen woorden of een gedicht
ooit beschrieven hou hij zong
“mooi” dat is toch veul te licht
veur een man als Robert Long

zien woordenschat was o zo breid
leifde, humor en venien
zat verbörgen in ieder leid
om over nao te denken, zo fien

zoas hij schreef en riemde
dat kan ja aans gien ein
met vaok een tekst die priemde
zo schaarp en vaoker nog, vilein…….

----------

Een poezie-album versie - Jolanda Huisman

Een doefie vrijlaoten
Vlög iens de wereld in
Want altied in een körfie
Is niet naor doefies zin

Iens vlieg jij ok de wereld in
Een wereld die'j niet kent
Vergeet dan nooit het körfie
Waor jij ooit oetvleugen bent


----------

Scheuveln - Hennie Stokker-Stadman

Ik wil zo graog nog éénmaol
scheuveln op ’t Oranjekanaol
Met de muts stief op de kop
stap ik bij Oranjedorp ’t ies op

Dan met lange slaogen
langs de mooie rietkraogen
Der even lekker an trekken
zo nou en dan de rug strekken

Ik kom in ‘t Haontje an
daor heb ze waarme kwast in ’n grote pan
Oh, wat smaokt dat goed
’t gef mij weer goede moed

Daornao zwoeg ik me voort
naor ’t mooie Schoonoord
Bij de brug is ’t waoter open
ik moet ‘n stukkie over ’t laand lopen

Dan gao ik wieder naor de Orvelter sluus
zo kom ik wel aal wieder van huus
Nou moet ik even goed kieken
jao, daor lig Hieken

Daor is ’t keerpunt
wat toch fijn daj zo scheuveln kunt
Met de haanden op de rug
begun ik an de weg terug

De benen word wel zwaor
maor ik zie ’t eindpunt al daor
Met de blaoren achter de hakken
gao ik veurzichtig langs wat wakken

Ik moet goed oppassen
natuur-ies wil je nog wel is verrassen
Jao, en op de kont vallen, dut zeer
’t heurt wel allemaol bij ’t winterweer

De winter het snei, regen en haogel te bieden
en soms ’n dun laogie ies om op te rieden
Maor jao, wanneer kunt we nou nog ’n maol
scheuveln op ’t Oranjekanaol

--------

Hierunder een gedicht van Martje Pronk-Hogenesch oet Gieten.

-----

Reünie

De lèeste maol dat ik dij zag
met Elvislok en breeide lach:
ik daach dij nooit meer te vergeten.

Noou zeei ik dij,
doe stelst dij veur:
nao vieftig jaor wel neudig.

Ik daach dat alles bleef
zaos het was en dat
allèen ik was veraanderd.

Dien brommer is noou
een rollator, dien lok is
vortwaaid in de tied.

Allèen die breeide laach
die is hetzölfde bleven,
wij schudt een haand en
gaot elk wieder met
oous eigen leven.

---------

Wij plaotst aal daogen in de Poëzieweek een gedicht van een facebookvriend. 

De eerste komp van oonze huusdichter van 2019: Gezienus Omvlee:

---------

Municipal,14 juli.

Moi volk,

Municipal. We bent Parijs veurbij
De camping waor we staot is typisch Frans
Al maokt we hier op nachtrust weinig kans
Vlak langs de camping löp de Route Soleil

We staot hier veur een appel en een ei
Wij eet hier stokbrood, smeerkees en croissants
Wat ok niks kost is lever van de gans
De campingbaos hef ok een mesterij

Het dorp dumpt vlak hierbij heur huusofval
En ’t stinkt naor auto’s, mest, mieg en methaon
Van ofvalscheiden liekt gien mens te weten

Jan vuult em al met al nogal bescheten
Die zol vandage liever verdergaon
Dan overnachten in Municipal

groeten,
Alie