WINNAARS VAN DE SCHRIEFWEDSTRIED 'VRIJ?' 2019-2020 VAN HET HUUS VAN DE TAOL BINT BEKEND

Dit jaor make wij de prieswinnaars bekend via de website van het Huus van de Taol en facebook. Deur het Corona-virus giet de huldiging in Börk niet deur.

Hoewel de juryleden zonder uutzondering vertelden dat het eigenlijk gien doen is, appels en peren vergelieken en dit jaor ok nog mit een thema waor zo veul inhold bij kan komen kieken, is der toch een keuze emaakt.

Het was lastig en zoas jurylid Gerrit Dannenberg zei:

Jureren is beoordelen en mangs ook veroordelen van creatieve producten. Dat kan onherstelbare schade biej de kunstenaar veroorzaken en geet dus fealijk tegen mien principe in, mer met een bloodend harte maak ik oonderstoande opmoarkingen oawer de verhalen.

Waoraj an kunt ofleiden dat de juryleden serieus wark van heur taak emaakt hebt. De jury bestund uut meinsen mit wortels in verschillende provincies: Ina de Raad, Peter Riksma, Gerrit Dannenberg, Ton Peters en de manuscriptenwarkgroep van het Huus van de Taol.

En de wedstried hef der in elk geval toe eleid dat der een groot antal prachtige verhalen eschreven bint. En daor binne wij heel bliede mit! Van een deel van die verhalen kunt de lezers van Zinnig ok mitgenieten, want de komende nummers zult der zeker nog verhalen eplaatst worden.

De winnaar van de schriefwedstried 2019-2020 van het Huus van de Taol en daormit € 350,00 rieker, is  

Are Meijer, hij schref in het Westerkwartiers, het verhaal mit de titel Port

PORT, Are Meijer

Een verhaal dat volgens ien van de juryleden stof veur een hele roman in zich hef, compleet mit psychologische ontwikkeling. Gien woord teveule, hooggeladen taalgebruuk; de spanning blef tot het leste. In compacte zinnen, to the point, wet de schriever de lezer te pakken. Origineel.

Nummer 2 is en daormit € 100,00 rieker:    Ada Waninge uut Roden, mit het verhaal Hoe vrij bi’j?

HOE VRIJ BI’J? Ada Waninge

In Hoe vrij bi’j vertelt een moeder an de dochter hoe zij de oorlog beleefd hef. Feitelijk gebeurt er niks, mar de lezer kreg tegeliek mit de dochter, een beeld van het alledaagse leven in de oorlog. De mensenkennis en wiesheid van de moeder is prachtig beschreven in dit kleine verhaal. Een tiedsdocument.

En nummer 3 is      Jessica Bonnema uut Assen, zij schreef Vrij?

VRIJ, Jessica Bonnema

Het verhaal, eigenlijk allent de gedachten van een oldere man in een verpleegtehuus die zien leven overzet, nemp de lezer as vanzölf mit naor het ende. De stukkies tussendeur, de contacten mit de verpleging, bint levensecht en het speulen mit de tied is knap. Een verhaal dat oe bijblef.

Eervolle vermeldings waren der veur: Jennie Lambers-Niers (Coevern), Tonko Ufkes (Grunning) en Ina Fischer (Vollenhove).

Rodney Niezen kreeg een biezundere vermelding, hij schreef een gedicht.