Willy Weerman, oeze taolschulte veur de gemiente Börger-Oring, wil nao 12 jaor het stokkie overdragen an een aander. Dus nou bin we bij het Huus van de Taol op zuuk naor een neie taolschulte!

Dizze ambassadeur vertegenwoordigt oes in de gemiente Börger-Oring en organiseert activiteiten zoas het veurlezen op basisschoelen in de meertmaond-streektaolmaond en onderholdt de contacten met de gemiente.  Vanzölf döt de taolschulte dit niet allenig; zij/hij wordt hierbij holpen deur aandere vrijwilligers uut de gemiente. Wiedere activiteiten op streektaolgebied wordt deur dizze groep zölf bedacht en uutvoerd.

Wie drag de streektaol net zo'n warm hart toe as Willy? Wie wilt 't stokkie van hum overnimmen en der veur zörgen daw deurgaot met de mooie dingen die as we in de gemiente Börger-Oring doet?

Veur meer informatie kuj bellen met oeze directeur Renate Snoeijing op 0593 -371010.

Het Huus van de Taol hef in elke Drentse gemiente een taolschulte. In Meppel is Eduard Annen vanof dizze zummer as taolschulte actief. Hie is daormet ambassadeur van de streektaol in dizze gemiente.
De taolschulte as ambassadeur hef feilijk drie hoofdtaken:
1. Representeren (vertegenwoordigt het Huus van de Taol in de eigen gemiente);
2. Controleren (an de bel trekken as de streektaol onrecht andaon wordt);
3. Organiseren van activiteiten (zoas het veurlezen op basisschoelen in de meertmaond).

Eduard Annen is zeker gien onbekende veur de mèensen in Meppel. Veur Sterk Meppel zit e in de gemienteraod. Körtleden hef e under andern het neis haald, deurdat e in de gemienteraod de brief van Drents op Stee aan de orde stelde, waorin die actiegroep de meugelijkheid tot het plaotsen van plaotsnaamborden in de streektaol an de orde stelde. Dit zörgde derveur dat der nuver en op inhold over het belang van streektaol proot weur in de gemienteraod van Meppel.
Behalve as raodslid kunt lu in Meppel en wiede umgeving Eduard Annen ok geregeld in fietskleding tegenkommen. Met zien fietsmaoten van FTC Grupetto mak e aal week toertochten in de prachtige umgeving van Meppel. Maor wieder achter de horizon verdwient e ok wal ies. Zo hef e met vrouw Jacqueline u.a. al mooie fietsvekaansies had in Rwanda, Iran en Zuudoost-Azië. In november giet het tweetal een dag of zeuventien op de mountainbike an de reis in Ethiopië. Een avontuurlijke geest kuj hum niet ontzeggen. Behalve avontuurlijk is Eduard Annen wieder ok een actief mens. Op meer gebieden zet e zuch in in veur de samenleving.In het dagelijks leven warkt e as Coördinator Arbeidsomstandigheden - Bedrijfscontactfunctionaris in De Wolden.

Het Huus van de Taol is der slim bliede met, dat Eduard Annen ambassadeur veur de streektaol in Meppel worden wil. Vanzölf kreg e daorbij hulp van aandere vrijwillgers, zoas bijveurbeeld Klaas Brand die in het dörp Nijeveen al jaoren hiel actief is. Maor meer helpers bint welkom. Aj ok liefde veur het Drents hebt en denkt dat je inzetten veur de streektaol ok wal wat veur je is, nim dan gerust contact op. Dat kan via het Huus van de Taol: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. of (0593) 371010.

Regionieuws Hoogeveen (het neis uut de eigen buurte) hef zoe goed ewest het deurgeefstokkie veur mèensen die hèur onbetaald inzet veur menaar deur te geven an een nei adres. Dat is de warkgroep van ’t Ogeveine van het Huus van de Taol eworden, en niet allint de net benuumde taalschulte van ’t Ogeveine Yvonne Biel, maor het hiele groepie dat onbetaald bezig is mit het onder de andacht bringen daorvan, 8 mèensen stark.

“Bij het aoverdragen van het wark van taolschulte is het zo daj een echte stok oppakt en daormit in dienst esteld bint”, vertelt Yvonne. De groep nèump vandage ok letterlijk de deurgeefstok aover van het Regionieuws Hoogeveen.

Um an te geven dat ze het de muite weerd viendt dat het Drèents blievend onder de andacht hölden wordt. In ’t Ogeveine tuurlijk veur het Drèents van ’t Ogeveine.

Daorumme schrif Yvonne Biel ok tweiwekelijks (op donderdag) een stukkie in het Drèents op de neisbladen van Regionieuws Hoogeveen.

Maor de warkgroep döt meer. Zo bint der in de ‘meertmaond, streektaolmaond’ in wel 30 van de 39 basisschoelen in de gemiente veur elèzen in het Drèents en koomt ze ok graag in verzorgingshuzen um een midddag veur te lèzen of te vertellen. Daor bint de mèensen barre bliede mit. De warkgroep wil dan noe ok graag weten van de instellings wele der belang bij hef dat ze langes koomt. Um jonge mèensen der bij te kriegen, dat is niet makkelijk. De warkgroep zet wel kaansen um dat te doen mit neie muziek in het Drèents. Kiek maor es naor Mooi Wark en Isa Zwart en zo.

De warkgroep van ’t Ogeveine kan hölpe gebruken van ‘keurnoten’, vertegenwoordigers in een dorp of een woonwieke, en in oonze gemiente veural in de butendorpen. Een grotere warkgroep kan nog meer doen veur meer mèensen, um an het wark te gaon mit het onder de andacht bringen van het Drèents, in de muziek of op schoelen.

Vertaling door Albert Metselaar

Twee neie Taolschultes wurden deur oonze Taoldrost Emko Dolfing installeerd. Leny Hamminga (rechts) volgt Herma Stroetinga in de gemeinte Tynaorl op. Yvonne Bijl-Hooijer (links) volgt Henny van der Haar in de gemiente 't Hoogeveine op.

De inschrieving veur de Streektaolstried in de gemeinte Tynaorl lop nog tot 16 meert! Op vrijdagaovend 20 meert um 20.00 uur begunt dizze Drèentse pubquiz bie café Hingstman in Zeijen. Hej een team van 4 of 5 man/vrouw, dan kuj je opgeven deur een mailtie te sturen naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.. Bellen kan ok: 0592-542608 / 06-23304774. Der is stee veur 25 teams.

De vraogen gaon neit allent over de streektaol. Het geit ok over historie en cultuur van de gemeinte. Het team met de meiste punten nao acht rondes van 8 vraogen, is winnaor en mag zuch een jaor laang het beste streektaolteam van de gemeinte Tynaorl nuimen.

Jans Tabak oet Diever is oet de tied kommen. In zien dörp en wied daorboeten is e bekend. Jans was een doezendpoot. As vrijwilliger was e biekaans bie alles in Diever drok doende. Hij stun geregeld op en achter de plaanken van toneelvereniging Diever (Shakespeare). Ok was e bij de begrafenisvereniging, de hervormde kark, de fiets4daagse, stichting Vrienden van de oude kerk en zo meer. Boetendat was e keurnoot van het Huus van de Taol in de gemiente Westerveld. Het Dreints heurde bij hum.

In juli is Jans 70 worden.

Op zaoterdag 9 november kwamen oeze taolschultes en keurnoten bij mekaar in de raodszaal van het gemientehoes van Beilen. Het programma van die mörgen was gevarieerd en gaf de anwezigen wat um over nao te praoten.

Zo begunden ze mit de ienakter 'Hartzeer bij de Hartliefs', speuld deur tenielverieniging Crescendo uut Gieterveen. Mit dizze hilarische Drentstaolige ienakter har Crescendo dit veurjaor de finale van het Ienakterfestival van het Huus van de Taol wunnen! 

Huus van de Taol Beilen Hartzeer bij de Hartliefs

Hiernao was het tied veur de taolschulte van 't Hogeveine: Yvonne Bijl-Hooijer. Zij vertelde over 'De baos & ikke', die van alles beleeft. Heur verhaolen staot um de week op dunderdag op Regionieuws Hoogeveen, mar vanzölf ok op heur Facebookpagina. Dizze morgen dreug ze twee verhaolen veur en de anwezigen hebt ongetwiefeld later nog terugdacht an de koppies die Yvonne lös in de kast har staon.

Nao een korte pauze wur het tied um de neie taolschulte veur Möppelt officieel te installeren. Bij afwezigheid van taoldrost Emko Dolfing, was plaotsvervangend taoldrost Jan Germs bereid vunden um dizze ceremonie in goede banen te leiden. Wij bint der slim wies met daw nou weer een taolschulte hebt in Möppelt. En wat veur iene!

An Arja & Renate de beurt um het publiek ies op een aandere menier naor de streektaol en het imago van de streektaol te laoten kieken. Nao een schiere prissentatie over hoe een imago opbouwd is, wat we zölf uutstraolen kunt en wilt en wat veur invloed wij as streektaolsprekers hebt op de niet-streektaolsprekers, wur het tied veur soep en kroketten.

Op 28 juni ankommend, organiseren de keurnoten van de gemeeinte Tynaorl veur de daarde keer heur wandeling: "LOPEN EN MEER".
Nao de succesvolle wandelings in Zeijen en Zeegse is nou de schiere umgeving
van Vreeis an de beurt. Kèenst Vreeis neit zo best en wilst wel ies weiten hou as ’t der daor oetzöt? Kom dan metwandeln!
 
De wandeling is zu'n 8 kilometer en daor loop je ongeveer twei en haalf uur over.
 
Tiedens dizze mooie wandeling dwaars deur de netuur, wor je verrast met optredens, die allemaol wat met de Drèentse taol te maoken hebben.
Metdoun kost niks, allènt de kovvie met een zölfgebakken kniepertie kost eein Euro.
 
De start is um 19.00 uur bij Café "ONDER DE LINDEN" an de Brink in VREEIS.

Tot 28 juni!             Keurnoten van Tynaorl

Pagina 1 van 3