Meer promotie - Huus van de Taol

Daor staot ze te wachten in deuzen, viefentwintigduzend Wiesneuzen! Te wachten totdat ze deur de veurleesders in de meertmaond wordt uutedeeld an basisschoelkiender in de provincie Drenthe. Wij bint der barre wies mit dat der aal meer schoelen mitdoet an dit veurleesfestijn in de meertmaond! En wat is het weer een mooi bladtie eworden!

Op 1 meert bestiet het Huus van de Taol tien jaor! Dat gaore wij vieren vanzelf! Op 4 meert is der van 10.00 - 16.00 uur een gezellig Lös Huus in het gemientehuus van Beilen, want daor wone wij!
Ie bint allemaol van harte welkom! Kiek maar ies op het programma. Der is vaste wat veur oe bij!

Wij kent Tieme Woldman allemaol van zien bijdrages in het blad Roet en in oons neie blad Zinnig en van zien boek Moord in het Mantingerveld, maar Tieme hef ok een column in Tweenul.nl, de site mit alle informatie over het amateurvoetbal in het Noorden. Op dizze site stiet een interview mit Tieme. Mooi um even te lezen.

De korte liest van de Dagblad van het Noorden streektaalpries is bekend. De pries wordt veur de twaalfde keer uutereikt. Dizze keer op 9 april in theater VanBeresteyn in Veendam. Der waren veertig inzendings. Alle literatuurnominaties op de korte lijst koomt uut Drenthe. In nachten dat ik naost joe lig, van schrijver Anne Doornbos, Waorom geleuft gieniene mij nou? van Roelie de Weerd, Het jaor deur met Drentse kinderliedties, Zinnig, Drents tiedschrift van het Huus van de Taol en Echt waor? Echt waor! van stichting Streektaol in Projecten en Huus van de Taol. Grunnen hef dan weer alle muzieknominaties: Keunenk van Westerdaipsterdale, Jan Henk de Groot, Rousteg Hoes van Krödde, Café op Driefklaai, Harry Niehof, De Noodzoak van Erwin de Vries en IJe aans verteld van stichting Vertellus, Mien Westerkwartier en vertelcollectief Kom op Verhoal.

Het Drèents Liedtiesfestival (DLF) wordt veur de zesde maol organiseerd met as doel het schrieven, oetvoeren en vastleggen van neie Drèentstaolige kwaliteitsmeziek. De organisatie -Stichting REUR- rop alle mezikaanten en tekstschrievers van Drèentstaolige meziek op um liedties in te sturen.

Bi 'j al Huusvriend? Of Huusvriend Plus? Kiek hier maar ies. Aj op oons Lös Huus koomt kriej een mooi kedogie aj Huusvriend van het Huus van de Taol wordt!  Dan steun ie oons wark op een  geweldige manier! Maar ie hoeft niet te wachten tot 4 meert heur! Klik hier maar ies!

De dichter Willem Tjebbe Oostenbrink hef mit zien Grunneger gedichtenserie Doar buten ien de wiede wereld de Johann Friedrich Dirkspries 2017 ewunnen. Dizze pries veur neie Nedersaksische literatuur wordt deur de stad Emden um de twee jaor toe- ekend.

Op 1 meert besteeit ’t Huus van de Taol tien jaor en daorom hew op zaoterdag 4 meert een jubileumfeest, een Lös Huus in ’t gemeeintehoes in Beilen. Elkeneein is vanzölf van harte welkom om even an te kommen en te kieken waw die dag almaol dooun. Eein van de programma-onderdelen op 4 meert is Loketpoëzie.

Het Huus van de Taol in Beilen viert het tienjaorig bestaon. Op 1 meert 2007 gungen Maondblad Oeze Volk, Stichting Het Drentse Boek en Stichting Drentse Taol saomen wieder under de naom Huus van de Taol. Het 10-jarig bestaon wordt vierd op zaoterdag 4 meert met een Lös Huus. Het Radio Drenthe-programma Hemmeltied is der met een live uutzending tussen 10.00 en 12.00 uur.

De Tamboer in 't Hoogeveine bestiet 50 jaor en dat viert zij o.a. deur een Drentse morgen te organiseren.  Een morgen waoraj genieten kunt van mooie Drentse verhalen, gedichten en muziek. Gasten bint: Heeren Oud-Zuid, Harm & Roelof, Jan Veenstra en Marga Kool. Aj der henne wilt kuj dat via De Tamboer regeln.

 

Pagina 1 van 70