HOOG BEZUUK

31 juli 2019

Maandagmiddag kwam der hoog bezuuk in het Huus van de Taol.

Gre Seidell-Broekhuizen uut Geldrop en Gerard Nijenhuis uut Bronneger, twei grote Drentse schrievers.

Beide schrievers kent mekaar al jaoren, sinds ze allebeide betrökken waren bij de Drentse Schrieverskring en Oeze Volk.

Het was dan ok een hartelijk weerzien tussen beide senioren.

Gre is 90 jaor eleden geboren an t Oranjekanaal, woonde lang in zuud-west Drenthe en nao heur trouwen verhuusde ze naor Eindhoven.

Ze schreef veul poezie in heur leven, jaorenlaank in het Drents, de leste jaoren ok in het Nederlands.

In 2010 verscheen bij het Drentse Boek een bloemlezing van heur wark in Aoverveer.

Maandag bracht ze een schitterende bundel mit naor Drenthe.

Negentig gedichten en prachtige foto’s, emaakt deur heur dochter Alydia. De bundel is emaakt veur en deur de familie, mar liefhebbers van de gedichten van Gre Seidell kunt contact opnemen mit het Huus van de Taol. Wij kunt dan kieken of het nog meugelijk is een boek te bestellen (25,- euro excl. bezorgkosten).

Gerard Nijenhuis woont al weer jaoren in Bronneger. Ok een schriever op leeftied, en iene die zien sporen dik verdiend hef in de Drentse schrieverswereld. Gerard schref nog steeds af en toe veur de Drentstalige tiedschriften Roet en Zinnig.