Studenten van de pabo in Emmen bint drok met meertaoligheid en dan komt het Drents vanzölf ok um de hoek kieken. Ien van de opdrachten was dit veurjaor um een meertaolig prentenboek te maken. "Guppie wil een goldvis worden" - maakt deur Kiara Lok, Sabine Meijering en Evelien Vos - stiet undertussen op de wiesneus-website. Kiek maor ies op die mooie website: wiesneus.nl 

 

In de Achterhoek is deur het Erfgoedcentrum Achterhoek en Liemers het tiedschrift Wiesneus uutegeven. As veurbeeld gebruukte dit centrum de bekende Wiesneus van het Huus van de Taol. Troubadour Hans Keuper zal op 11 juli muziek maken en verhalen vertellen tijdens de priesuitreiking van het streektaalproject Wiesneus. An dit project deden meerdere basisschoelen in de Achterhoek mit. As de plannen deurgaot en der wordt al drok over vergaderd dan zal er veur een groot deel van het Nedersaksisch taalgebied volgend jaor een gemienschappelijke Wiesneus uutkomen. Ieder in zien eigen streektaal vanzelf!

In het Huus van de Taol in Beilen is vanof woensdag 6 juni een neie expositie te bewondern. In de veur iederiene toegankelijke gangen van het Huus van de Taol hangt zo’n dikke twintig olievarfschilderijen van Henk Eefting uut Echten. Eefting tiekent en schildert al sinds zien kiendertied. Sinds de negentiger jaoren is hij zich meer gaon toeleggen op stillevens. Een hang naor het olde en warme van vrogger is in zien wark terugge te vienden. Olde bloempotten, gebarsten liesties en kannen en kruken wordt bij Eefting tot in elk detail vereeuwigd. Naost het schildern schref Henk Eefting ok gedichies in het Drents. Bij elk schilderij hef hij een gedicht emaakt dat as een soort toelichting op de afbeelding te lezen is. Het is miestal commentaar mit een knipoog. De stillevens van Henk Eefting bint tijdens kantooruren tot end juli deur iederiene te bekieken in het Huus van de Taol.

 Het is zo wied. Alja Kiers stopt met warken bie het Huus van de Taol. Vandaog is heur leste warkdag. Tegelieks is der ok de boekenmarkt veur de vrijwilligers. Alja, bedankt veur al die jaoren daj bie het Huus van de Taol / Het Drentse Boek warkt hebben.

Muggenklappers!

22 mei 2018

Heb ie wel ies een neefie doodeslagen? Het klinkt barre griezelig, maar een neefie in het Drents is een mug! Ze kunt oe zo um de kop soezen daj der mal van wordt! Vandaor daj nou bij het Huus van de Taol Drentse muggenklappers kunt kopen. Zij kost € 2,95 en bint verkriegbaar in oonze webwinkel www.drenthecadeaus.nl  en vanzelf in het Huus van de Taol.

In een gezellig vol MeM paviljoen in Leeuwarden, onderdeel van het Talenpaviljoen in Leeuwarden (onderdeel van het programma van de culturele heufdstad van Europa), is op 13 mei het slotprogramma van de Drentse taalweek holden. Op het programma stund onder andere de uutslag van de Schriefwedstried 2017/2018 van Het Huus van de Taol. An dizze schriefwedstried deden zo’n zeuventig schrievers mit uut het hele Nedersaksisch taalgebied. Der waren juryleden uut elke regio. Unaniem waren ze van mening dat de verhalen een goed niveau hadden en dat het beslist gien straf was die te mutten lezen. En dat het een moeilijke taak was um de winnaar te kiezen, dat schreef ok elk jurylid. Uuteindelijk bleek dat het verhaal Soamen in het Westerkwartiers van Tonko Ufkes de meeste punten kreeg. Een gedeelde pries was der veur Janet Baron- Lopers (Drents) en Jan de Jonge (Grunnings). Hennie Stokker-Stadman wun de pries veur het best veurgelezen verhaal. Daornaost waren der eervolle vermeldings veur Are Meijer, JennyAnna Linde en Wil Eefting.

Sinds 1 mei is Jan Regtop an het wark bij het Huus van de Taol / Het Drentse Boek. Hij volgt Alja Kiers op die met ingang van 1 juni stopt. Jan stelt zich even an oe veur.

Mien naam is Jan Regtop, 52 jaor en geboren en getogen in Slien. Daor woon ik nou ok nog steeds met mien vrouw Grietje en zeun Frank van 13.

In mien vrije tied ben ik veul op het voetbalveld te vinden. As voetballer zölf en ok as jeugdtrainer of scheidsrechter. Op 1 mei ben ik begund bie het Huus van de Taol en daor heb ik veul plezier an!

Leeuwarden is van ’t jaor culturele heufdstad van Europa en noe zuj zeggen wat hef dat met Drèents te maoken? Nou, toch wel wat, ’t Drèents hef daor van zundag 6 mei tot en met zundag 13 mei een stee in ’t preject Lân fan Taal. In ’t centrum van Leeuwarden, in de Prinsentuun steeit een paviljoen met de naom Talenpaviljoen MeM – Livingroom of Languages. Dat paviljoen is een gebouwgie dat een moouder met lange rokken veurstelt. Wij hebben ja allemaol onder mam zien rokken oouze mooudertaol leerd. Dat paviljoen is de ontmoetingsplaots veur taolgemeeinschappen in Lân fan taal. Op vaste momenten in de week worden er optredens en aander activiteiten programmeerd. Het is een gezellige ruumte waor je best even zitten kunnen. In het paviljoen kuj ok een kop koffie drinken of een happie eten. De horeca wordt daon deur dove mèensen, zodat elkeneein zich redden moet met gebaoren. Je leggen joen taol even an de kaant.
Ankommen week, van zundag 6 mei tot en met zundag 13 mei steeit de Drèentse taol centraol. Op zundag 6 mei neem wij ‘t over van de Limburgers, dan hebben wij een gezaomelijk programma met ’t Limburgse duo Pyure en wordt de dichtbundel Binnenkort uitverkocht prissenteerd. Het is een dichtbundel met Ollekebollekes van veer Drèentse dichters over kunstwarken in de openbaore ruumte van Grunning, Drenthe en Freeislaand. HEt boek kuj ok via de webwinkel van Het Drentse Boek verkriegen.
Op dunderdagaovend 10 mei zal Margaretha Kleine optreden saomen met de Freeise band Mosken, een eigenzinnige Frysktalige band.Op zundag 13 mei nemp Braobant ’t weer van oous over, dat dan hew een Braobants-Drèents programma. Bert Rossing van het Huus van de Taol in Drenthe en Jos Swanenberg oet Braobant lezen veur in de taol van de aander. De Drent Bert Rossing les veur oet het Braobantse boek ‘Merijntje Gijzen’ en de Braobander Jos Swanenberg les veur oet het Drentse ‘Bartje’.
Wieder dizze middag de oetreiking van de priezen van de Nedersaksische schriefwedstried. De winnaor les zien verhaol veur. De Rederiekerskamer Börger speult het stuk Mien eigen weg en het Braobantse duo Lya de Haas en Hennie Korsten tred op en zingt liedties in het Braobants. Kiek hier veur meer informatie

Pagina 3 van 48