Um nationale minderheden en minderheidstalen een betere toekomst te geven is een burgerinitiatief van de Federal Union of European Nationalities 'Minority Safepack' opezet. Der bint in Europa umdebij vieftig miljoen mèensen die bij een nationale minderheid heurt of die een minderheidstaal praot. Zij bevördert de taolkundige en culturele verscheidenheid in Europa. Samen mit aandere Europeaonen wilt ze ok an het roer staon as het giet um de toekomst van de Europese Unie - een toekomst waorin niet allent officiële talen of overheersende culturen belangriek bint, maar waorin ok rekening eholden wordt mit autochtone minderheden. Veur het behold van heur identiteit wilt de minderheden bescharming en steun. Ie kunden oen haandtieken zetten op de petitie. Het doel was um een miljoen stemmen bij mekaar te kriegen en dat is elukt! Veur alle zekerheid wilt ze eigenlijk nog graag wat extra ondertiekeningen, zodat ze zekerder bint. Dus aj nog niet etiekend hebt gao dan naor de folder en tieken de petitie op www.minority-safepack.eu Ie hebt nog twee dagen de tied.

Annie Veenema uut Börger mag zich de miest loze Drent van 2018 numen. Zij versleug in de finale Diana Huizing-Beekelaar uut Hollandscheveld en Rianne Nieuwenweg uut Drouwen. Naost de mooie bokaal kreeg Annie vrijkaorten veur het Drents Museum. Dit seizoen gungen de vraogen in LOOS niet allent over de streektaal, maar ok over de Drentse geschiedenis, topografie en actualiteit. Loos is een samenwarkingsproject van RTV Drenthe en het Huus van de Taol, Herinneringscentrum Kamp Westerbork, het Hunebedcentrum en het Drents Archief. Het programma wordde prissenteerd deur Erwin Kikkers. Woj de aoflevering nog een maol zien?

De meertmaond streektaalmaond is zowat veurbij. Reden veur RTV Drenthe um op 30 meert de hiele dag in het Drents te prissenteren. Wij viendt dat vanzelf een hiel schier plan. As anvulling meuken mitwarkers en een taalschulte van het Huus van de Taol bij RTV Drenthe een filmpie waorin alle zeuven streektaalvarianten van het Drents te heuren bint. Te heuren en te zien op de social media.

Op 1 april zal Hermien Haar niet langer warkzaam wezen as uutgever bij Het Drentse Boek en het Huus van de Taol. Het zat der al een poosie an te komen, maar nou is het dan zover. Hermien blef nog wel boeken en tiedschriften maken en de financiële administratie doen, maar het uutgeversgedeelte zal worden overeneumen deur Bert Rossing. Wij neemt mit weemoed ofscheid van Hermien, zij hef zo ongeleuflijk veul wark verzet. Wij hoopt dat zij gloepends giet genieten van de extra vrije tied die zij nou kreg. En, hoewel Hermien van de 1 aprilgrappen is, geleuve wij toch echt dat het dizze maol ernst is.

Het Huus van de Taol organiseert in meert 2019 veur de daarde keer het Drentstalige ienakterfestival Kört & Goed. Nao drie veurrondes is de finale op 30 meert 2019 in theater Ogterop in Möppelt. Het Huus van de Taol röp tonielverenigingen, buurtverenigingen, vriendenclubs of welke andere groep of persoon dan ok um zich an te melden. Deelnemers wordt evraogd um een ienakter in te studeren van minimaal twintig en maximaal dartig minuten.  Het mag gaon um een kleine groep, maar een grote groep speulers is net zo goed toe-estaon. De keuze van genre is vrij: van familieveurstelling tot klucht tot eernsachtig. Ienakters kunt opevraogd worden bij bestaonde uutgeverijen, bibliotheken of bij het Huus van de Taol. Het zul barre mooi wezen as der neie ienakters eschreven zullen worden. Elke deelnemende groep kreg een bedrag van 100 euro, waormit kosten veur reproductie, Buma e.d. betaald kunt worden. Deelnemers hebt recht op deskundige hulp op het gebied van de Drentse taal en ondersteuning bij de regie. De drie veurrondes bint in café Hingstman in Zeijen (vrijdag 8 maart), zalencentrum Wielens in Noord-Sleen (vrijdag 15 maart) en café Centraal in Ruinerwold (zaterdag 16 maart). Een deskundige jury beoordeelt de stukken. Groepen die mitan doen wilt, kunt zich tot 10 september 2018 anmelden bij het Huus van de Taol ( Jan Germs 0593 371010 of Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. ) Hier kuj ok meer informatie kriegen.

 

Op Goede Vrijdag en Tweede Paosdag is het kantoor van het Huus van de Taol dichte.

Sinds maandag 26 meert stiet de streektaalpuzzel van het Huus van de Taol in het Dagvblad van het Noorden. Aj de puzzel goed invult is der van boven naor beneden een spreuk te lezen. Um dizze spreuk giet het. Ie kunt de oplossing, onder vermelding van veur- en achternaam en volledig adres tot 9 april insturen naor het Huus van de Taol, Postbus 163, 9410 AD Beilen of naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. Der bint mooie priezen te winnen: de heufdpries is een verrassingspakket van het Huus van de Taol, maar der nog veul meer te winnen! In de loop van april make wij de prieswinnaars bekend.

Op 15 april wordt bekendemaakt wie de Streektaalpries van het Dagblad van het Noord 2017 hef ewunnen. Veur het eerst kuj nou zelf stemmen veur de publiekspries. Op de site van het Dagblad van het Noorden staot de fimpies van de genomineerden. Dat bint: Jannie Boerema (Leeive Lieve Eva), Rouke Broersma (Drentse letteren) en Leny Hamminga (Lena) in de categorie proza en Poëzie en in de categorie cd/dvd: theatergroep Waark (De Menalda vetes), Harm en Roelof (Daor stiet je fiets) en Krzysztof Groen (Noar de volgende ronde).
Ie kunt stemmen tot 13 april um middernacht . De dartiende Dagblad van het Noorden Streektaalpries en de deur oe bepaalde publiekspries wordt zundagmiddag 15 april uitereikt in theater vanBere-steyn in Veendam. De aanvang is im 14.00 uur. Toegang is gratis.

 

Pagina 6 van 50