Op 15 april wordt bekendemaakt wie de Streektaalpries van het Dagblad van het Noord 2017 hef ewunnen. Veur het eerst kuj nou zelf stemmen veur de publiekspries. Op de site van het Dagblad van het Noorden staot de fimpies van de genomineerden. Dat bint: Jannie Boerema (Leeive Lieve Eva), Rouke Broersma (Drentse letteren) en Leny Hamminga (Lena) in de categorie proza en Poëzie en in de categorie cd/dvd: theatergroep Waark (De Menalda vetes), Harm en Roelof (Daor stiet je fiets) en Krzysztof Groen (Noar de volgende ronde).
Ie kunt stemmen tot 13 april um middernacht . De dartiende Dagblad van het Noorden Streektaalpries en de deur oe bepaalde publiekspries wordt zundagmiddag 15 april uitereikt in theater vanBere-steyn in Veendam. De aanvang is im 14.00 uur. Toegang is gratis.

 

Zomerzinnen wordt dit jaar in Dwingel eholden. De organisatie van het festival giet vurt uut Amen, umdat het festival in Amen niet goed groter greuien kan. Zomerzinnen verwacht op 16 juni schrievers as Tommy Wieringa, Marieke Lucas Rijneveld, Maxim Februari en ok streektaalschrievers as Marga Kool en Jan Veenstra. Meer informatie op www.zomerzinnen.nl  

De Drenthecursus Eext is klaor. Cursusleider Jan Hartlief har een enthousiaste groep met veul humor. Ien van de cursisten Leonie Sinnema schreef namens het Dagblad van het Noorden elke week een stukkie over de cursus in de kraant.Het leste stukkie kuj hieronder lezen. Ok in Koekangerveld wordde dizze week een Drenthecursus en in Beilen een Dieper deur Drenthe-cursus oferond.

Sinds 20 meert exposeert Niesje Metselaar uut 't Hollaandscheveld in het Huus van de Taol. Niesje hef een passie veur landschappen, veur bloemen en veur dingen met een verhaal. In september 2016 stund zij op het bruggie over het Olde Diep bij Echten en wordde etröffen deur de schoonheid van het landschap. Zij besleut um het Olde Diep te gaon schildern en wel tegen de stroom in. Het bint uuteindelijk 71 schilderijen eworden die oe mooi laot zien hoe of het stroompie löp. Kom gerust ies kieken in het Huus van de Taol. Ie bint tijdens kantooruren van harte welkom!

Op 15 meert is bij de stichting Wolderwijs onderwijs en kinderopvang de map Echt waor? Echt waor! toe-elicht en officieel uutereikt deur wetholder Mirjam Pauwels an alle schoelen in De Wolden. Een mooi kedo mit een Drents accent!

 

Wetholder Wekema van de gemeinte Noordenveld hef het eerste dubbeltalige plaatsnaambord van Drenthe in Nei-Roon onthuld. Umdat Nei-Roon as dorp uutebreid is, was der behoefte an een nei plaatsnaambord. Dankzij de vereniging dorpsbelangen stiet bovenan de Nederlandse naam van het dorp en daoronder de Drentse naam.

Het actiecomité Drents op Stee hef in de nacht van 13 op 14 meert weer een paar plaatsnaamborden veurzien van heur Drentse name. Dizze keer waren Wisp (Wezup), Wespert (Westdorp) en Hieken (Hijken) an de beurte. Drents op Stee viendt dat der meer Drents te zien mut wezen in de openbare ruumte. Dizze ludieke actie kent wel een serieus vervolg. Want vrijdag a.s. zal in Nieuw-Roden het Drentse plaatsnaambord Nei-Roon toe-evoegd worden.  Nieuw Roden is nl egreuid en der mus sowieso een nei bord komen.De vereniging Dorpsbelangen Nieuw Roden vreug um de Drentse toevoeging.

 

 

Drentse Vereniging  't Aol'Volk wordde op 24 februari 1948 opericht. En dat betiekent dat zij dit jaor 70 jaor bestaot! Dit wordde zaoterdag 10 maart uutgebreid evierd.Een zeuvental vrijwilligers kregen extra aandacht, zij hebt zich nl. al 25, 50 of zelfs 65 jaor inezet veur de vereniging.

Pagina 8 van 52