Zundag 4 meert kuj weer naor Taal an Taofel bij Grand Café De Brink in Dwingel. Gasten bint dizze keer Roelie Bakker (proza/poëzie), Derk Jan ten Hoopen (proza), Luc Oostra & Cor Többen (mit meziek bij teksten van Suze Sanders). Taal an Taofel begunt um 11.00 uur en is um 14.00 uur ofelopen. Meer informatie kuj lezen in de folder.

Op donderdag 1 meert bint alle vrijwilligers van het Huus van de Taol uuteneudigd um mit te komen praoten over het meerjaorenplan van het Huus van de Taol. In september was der een eerste bijienkomst en de vrijwilligers hebt toen mitedacht en mitepraot over de toekomst van het Huus van de Taol. Binnen toen en veer jaor zulden een aantal personeelsleden de leeftied bereiken waorop zij zulden vertrekken. Nou blek dat deur een samenloop van omstandigheden een aantal personeelsleden nogal rap achter mekaar opstapt. Ieder hef zien eigen verklaarbare reden, maar het is wel wat veul in korte tied. Erwin Kikkers gunk met ingang van 1 jannewari in volledige dienst warken bij RTV Drenthe. Zien taken bint overeneumen deur de aandere personeelsleden van het Huus van de Taol.  Hermien Haar (in december 65 eworden) döt vanof 1 april ofstand van heur uutgeversbaan. Bert Rossing zal de neie uutgever van Het Drentse Boek worden en kreg daorveur extra uren. Hermien Haar blef op freelance basis nog actief veur het Huus van de Taol en zal samen mit Bert Rossing en Baukje Bloemert redactionele taken veur het blad Zinnig op zich nemen. Alja Kiers kös op 1 juni veur het vrijwilligerswark en hef deur het wegvallen van jaorenlange mantelzorg samen mit heur man nou meer tied um aandere dingen te gaon doen. Zij blef vrijwilliger bij het Huus van de Taol en zal de cursusklus op zich nemen. Tenslotte hef Abel Darwinkel anegeven op 1 oktober mit zien beroepsmatige wark veur de streektaalorganisatie te stoppen. Dé kenner van het Drents hef toe-ezegd dat hij wel beschikbaar is um zien kennis veur het Huus van de Taol projectmatig in te willen zetten.
Zoas hierboven ezegd, is het wat veul in korte tied. De sollicitatieprocedure um een goeie opvolger veur Alja te vinden, is in volle gang. Aander week bint de sollicitatiegesprekken. Deur intern schoeven van warkzaamheden en oetbreiding van uren veur Bert kun we alle activiteiten prima doen blieven. Wat de opvolging van Abel angiet, is het bestuur drok gangs de beste weg uut te stippeln.

Op donderdagaovend 22 meert kuj naor een Streektaalaovend in de bibliotheek van Beilen. Gasten bint: Anne Doornbos, Geert Jan Brader en de Rederijkerskamer uut Börger. De aovend begunt um 19.30 uur. Kaorten kuj in de veurverkoop halen bij de bibliotheek van Beilen of bij het Huus van de Taol. Zij kost dan € 7,50. Op de aovend zelf betaal ie 10 euro.

Jan Germs much midden in de nacht op Hilversum an um mit te doen an het programma Dit is de nacht van NPO1 Radio 1. Hij zat samen in uutzending mit Ans Wallinga (docente Fries). Aj het programma terug wilt luustern dan kan dat. https://www.nporadio1.nl/dit-is-de-nacht
Kiek bij 27 februari en scroll naor Hoe staat het ervoor met de streektaal?

Het is weer Meertmaond Streektaolmaond, dus tied veur LOOS! Iedere dag striedt drei speulers um de titel miest loze Drent mit vroagen over Drentse taal, cultuur en sport. Vanof 1 meert elke warkdag uutzending vanof 17.16 uur. Prissentatie: Erwin Kikkers. LOOS is een samenwerkingsproject van RTV Drenthe en het Huus van de Taol.

Al dik dartig jaor wordt der cursussen organiseerd over de Drèentse taol. De docenten van het Huus van de Taol hebt de leste tien jaor meer as doezend cursisten veul leerd over de Drèentse taol en cultuur. In de maonden jannewaori, feberwaori en meert 2018 wordt der een Drenthecursus van aacht week geven in Eext en op Koekangerveld. In beide plaotsen bint der virtien cursisten. In Beilen bint 11 cursisten negen week an de gang met de cursus Dieper deur Drenthe. Begun oktober begunt der een Drenthecursus van acht lessen in de plaotsen Erica, Beilen, Rune, Roneresch en Emmen. In Nijevene wordt een Dieper deur Drenthe-cursus holden veur cursisten die de Drenthecursus al ies volgd hebt. Aj ok ies een gezellige, Drèentse cursus volgen wilt, neem dan contact op met het Huus van de Taol. Ok aj niet in de buurt woont van de plaotsen hierboven, want der komp hier of daor vast nog wel een cursus bij.

26380 Wiesneuzen ligt in het huus van de Taol deuzen te wachten totdat zij uutedield wordt an veurgelezen kiender. In de meertmaond gaot weer een paar honderd vrijwilligers op pad um tijdens de streektaalmaond veur te lezen an basisschoelkiender. Roem 70% van alle basisschoelen uut Drenthe doet mit an dizze veurleesactie, waorbij kiender speulenderwies in aanraking koomt mit het Drents. In de Wiesneus staot verhaalties, strips, recepten, gedichies, een kleurplaat en puzzels. En daor kuj machtig mooie priezen mit winnen!

Taal an Taofel is luustern naor schrievers en muzikanten en ook nog ies lekker eten. Wat woj nog meer? Op zundag 11 febrewaori kunj in Zaal Wielens in Noord-Sleen naor schrievers Cathrien Witvliet-Thalen en Aagje Blink luustern. De meziek komp van Bert Kamping. Taal an Taofel begunt um 11 uur en um 14.00 uur kunj weer op boeten. Entree is € 19,--. En dat is dan met koffie en waarm eten. Opgeven kan bie Reina Zwiers (0591-362371)(Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.)

Pagina 8 van 48