Al dik dartig jaor wordt der cursussen organiseerd over de Drèentse taol. De docenten van het Huus van de Taol hebt de leste tien jaor meer as doezend cursisten veul leerd over de Drèentse taol en cultuur. In de maonden jannewaori, feberwaori en meert 2018 wordt der een Drenthecursus van aacht week geven in Eext en op Koekangerveld. In beide plaotsen bint der virtien cursisten. In Beilen bint 11 cursisten negen week an de gang met de cursus Dieper deur Drenthe. Begun oktober begunt der een Drenthecursus van acht lessen in de plaotsen Erica, Beilen, Rune, Roneresch en Emmen. In Nijevene wordt een Dieper deur Drenthe-cursus holden veur cursisten die de Drenthecursus al ies volgd hebt. Aj ok ies een gezellige, Drèentse cursus volgen wilt, neem dan contact op met het Huus van de Taol. Ok aj niet in de buurt woont van de plaotsen hierboven, want der komp hier of daor vast nog wel een cursus bij.

26380 Wiesneuzen ligt in het huus van de Taol deuzen te wachten totdat zij uutedield wordt an veurgelezen kiender. In de meertmaond gaot weer een paar honderd vrijwilligers op pad um tijdens de streektaalmaond veur te lezen an basisschoelkiender. Roem 70% van alle basisschoelen uut Drenthe doet mit an dizze veurleesactie, waorbij kiender speulenderwies in aanraking koomt mit het Drents. In de Wiesneus staot verhaalties, strips, recepten, gedichies, een kleurplaat en puzzels. En daor kuj machtig mooie priezen mit winnen!

Taal an Taofel is luustern naor schrievers en muzikanten en ook nog ies lekker eten. Wat woj nog meer? Op zundag 11 febrewaori kunj in Zaal Wielens in Noord-Sleen naor schrievers Cathrien Witvliet-Thalen en Aagje Blink luustern. De meziek komp van Bert Kamping. Taal an Taofel begunt um 11 uur en um 14.00 uur kunj weer op boeten. Entree is € 19,--. En dat is dan met koffie en waarm eten. Opgeven kan bie Reina Zwiers (0591-362371)(Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.)

In maart bint der weer dagelijks uutzendingen van het programma Loos. Erwin Kikkers zal het programma prissenteren. Der bint op dit moment genog angemelde deelnemers veur Loos. Ie kunt je niet meer anmelden.

Over enkele weken komp het boek Nijntje in 't dierenpark uut bij uutgeverij Bornmeer. Het oorspronkelijke boek Nijntje in de dierentuin van Dick Bruna is vertaald in het Drents deur Daniël Lohues.Bornmeer gef al jaorenlang boeken in streektalen uut. Aj het boek wilt bestellen kuj over enkele weken in de boekhandel terecht of via de website van uutgeverij Bornmeer.

Nao de opleiding schilder- en grafische kunsten an de Academie Minerva te Groningen gunk Arend Kuiper (1952) mit een bakfiets op pad um in Drenthe plekkies te zuken waoras hij kun schildern. Hij begunde mit landschappen, maar later kwamen daor meinselijke activiteiten bij. Landschappen meuken veur een deel plaats veur interieurs mit of zonder figuur en stillevens. “Mijn omgeving ziet er nooit uit als ik haar zou wensen “ zeg Arend en daorum schildert hij een wereld zoas hij die zelf graag zol willen zien. Mit zien kenmerkende kleurgebruuk en deur het ongedwungen hanteren van compositie en vormen leg Arend een intieme en warme sfeer in zien schilderijen. De expositie is op kantooruren te bezichtigen in het Huus van de Taol, Raadhuisplein 1 in Beilen. Veur meer informatie kuj op zien website kieken.

 

Oonze mitwarker Erwin Kikkers was al veur een groot deel van de week an het wark bij RTV Drenthe. Vanof 1 jannewari brengt hij daor al zien warkuren deur. Dat betiekent dat Erwin is vertrökken bij het Huus van de Taol en dat meuit oons barre, want Erwin paste hiel best in het team. Wij zult hum missen, maar vanzelf wensen wij hum hiel viel geluk bij RTV Drenthe. En wij bint wel wies mit alweer een Drentssprekende mitwarker bij RTV Drenthe!

Akkederen

3 jan 2018

In december 2017 weur het woord akkederen in het radioprogramma De Brink van RTV Drenthe keuzen tot Drentse woord van het jaor. Verscheiden kraanten hebt der een stukkie over schreven.

Daornao hef het Huus van de Taol een stuk of wat reacties kregen van mèensen die zeden dat akkederen gien Drèents woord is, omdat het ok in het Nederlands, Vlaams en in een koppel aander streektaolen gebruukt wordt.

Akkederen komp inderdaod ok in ’t Nederlands en in aander streektaolen veur, mor dat holdt niet in dat het dan dus gien Drèents woord is. Het Nederlands en het Drèents en de aander streektaolen in Nederland hebt veur een diel een gemienschappelijke geschiedenis en dus hebt ze ok woorden die hetzölfde bint.

Dik, groot en klein bint Nederlandse, maor ok Drèentse woorden. ‘Old’, ‘gold’ en ‘stolen’ binnen Engelse woorden, mor in ’t Drèents schrief wij ze net zo en betiekent ze percies ’t zölfde. ‘Stein’ en ‘Bein’ bint Duutse woorden veur stien en bien. In ’t Noord-Drèents komt bein en stein ok veur. Aal dizze woorden bint ok Drèentse woorden, net as akkederen.

Woorden die maor in ien taol veurkomt, bint der niet zo veul.

Pagina 9 van 50