Andries Middelbos
Tegenwoordig stiet Drieber beter bekend as het dörpie an de voet van de Col du Vam, waor het NK wielrennen 2020 holden weur.
Meer dan 25 jaor warkte Andries as dramadocent an de lerarenopleiding Rotterdam, maor in 2001 is e weer terugkeerd naor Drenthe. Sinds die tied ok begund met het schrieven van verhalen en liedties in het Drents. De oorsprong van dizze verhalen lig in zien eigen kiendertied op het Drentse plattelaand. Hie beschref op een humoristische menier hoe as kiender toen opgruiden en groot weurden.
Een antal van dizze verhalen is publiceerd in de tiedschriften Maandewark en Zinnig van het Huus van de Taol en met het liedtie Bruno kwam e in de finale van het Drents Liedties Festival van RTV Drenthe. Ok is e lid van de warkgroep Drentstaolige kerkdiensten van het Huus van de Taol.
Andries brengt een programma van liedties en verhalen over de tied dat de striepkoornbroek de mode was en er elk jaor pas een ende kwam an de wollen börstrok en levertraon as de ‘R’ weer oet de maond was: De Tied van striepkoornbroek, wollen börstrok en levertraon.
De tied daj zaoterdags umstebeurt in de tobbe gungen en vekaansie een daggie op de fietse naor het Maantingerzaand was. De tied dat de mister van klas vier een kind even hen de krudenier stuurde veur een pakkie Caballero, omdat e de hiele dag kettingrokend veur de klas hen en weer banjerde. De tied dat op verjaordagen en bruloften op elke taofel een glassie met sigeretten en sigaren stun. Körtom verhalen en liedties over alledaagse dinger uut die tied. Serieus, luchtig, soms hilarisch en vaak met lichte zölfspot. In het programma begeleidt hij zichzölf op accordeon, piano of gitaar en wisselt verhalen en liedties mekaar of.
Een greep oet het programma:
- Tobbedag
- Griesmeelpap met kloeten
- Levertraonverdriet
- Verzuilde stoet
- Hemel- en hemmeltied
- Op ’t jak
- De neie boks
Hoewel de verhalen en liedties in het Drents bent, is het ok veur niet-Drenten goed te volgen.
Veur meer informatie kuj kieken op Streektaalzang.