Productomschrijving

De schriefwarkgroep van het Huus van de Taol hef in coronatied ‘gewoon’ deuredaone. Online, dat wel. Veur een paar schrievers was het de eerste keer dat ze online vergaderden. En het gung in de meeste gevallen prima.

Toch was het wat behelpen en daorumme kregen de schrievers een speciale opdracht; ze mussen een novelle schrieven van minimaal dartig bladzienden. Dat is heel wat aans as het schrieven van een verhaal of gedicht. As extra uutdaging kregen de schrievers ok nog veer keer een aandere opdracht waor de novelle inholdelijk of in stijl an mus voldoen. Zo  mus de hoofdpersoon gebaseerd weden op een historische figuur.

Dit leidde tot de bundel De vluchteling en de Nachtegaal, twei novelles in ien baand, eschreven deur Jan Bruins en Hennie Stokker-Stadman.

Jan Bruins (1942) gruide op in Karkenveld en nao zien wark veur de vakbond, was hij lang veurzitter van Drenten in de Vrömde en kwam toen in anraking mit de Dreinse schrieverij. Veur de novelle deed hij onderzuuk in de bibliotheek en maakte een mooi ‘rond’ verhaal waorbij hij lat zien daj as tachtigjaorige nog heel best mit een open blik in de wereld kunt staon.

Hennie Stokker-Stadman (1956) woont al jaoren in Exloo en gef in de hele provincie veurdrachten bij verenigings en les veur uut heur verhalenbundel. Veur heur novelle keus ze derveur um dat wat ze um heur hen zag an problemen in de zorg, te vertalen naor een verhaal waor ze op slimme maniere mit de tied speult en waorin ze meinsen van vleis en bloed wet neer te zetten.