Egbert Bussemaker (1941)

In 1965 studeerd’e of as warktuugbouwkundig ingenieur in Delft. Van 1967 tot 2001 warkt’e bij de Koninklijke Machinefabriek Stork in Hengelo en de pompproducenten Stork Pompen bv, BW/IP en Flowserve in Hengelo.

Toen Egbert met de vut gung is e meer schrieven gaon (Nederlandse en Drentse limericks, Drentse verhaalties en Drentse gedichten).

Het eerste verhaaltie dat redacteur Bart Veenstra van Bussemaker in Oeze Volk plaotste, was De boks (november 2003). Zien debuut als dichter volgde in 2011, toen het gedicht De ekster verscheen in  Maandewark-Oeze Volk  (meert/april 2011). Zien eerste limericks (op Baoling, Veenhoezen en Wiester) stunden in Oeze Volk van jannewaori 2004. In totaol hebt er meer as vieftig limericks publiceerd west.

In eigen beheer verschenen Drèentse verhaalties en limericks (2005 en 2007) en Garminge Vroeger Herinneringen van Egbert Bussemaker aan zijn jongenstijd in Garminge in de vijftiger jaren (2006 en 2013). Bussemaker leverde ook historische bijdragen an het kwartaaltiedschrift van de Historische Veriening Gemeente Westerbork.

Met zien partner Sonja Meijer schreef e in 2012 de teksten bij de 17 mandala’s in het boek Mijn mandala’s / Meine Mandalas van Marian Harmsen (oetgeven deur stichting Prisma); de tiekeningen bint van de in 1998 an börstkanker overleden Marian Harmsen.

De gedichten van Egbert Bussemaker komt vaak vanoet herinneringen an zien jeugd in Garminge. Nao zien studie in Delft hef e nooit meer in Drenthe woond, maor zien schrieverij giet daor wal geregeld over. Hie prebeert bij de lezer op zien minst een glimlach op te wekken.

Boekpublicaties:

• Drèentse verhaalties en limericks (2005);
• Mijn mandala’s / Meine Mandalas van Marian Harmsen (teksten van Egbert Bussemaker en Sonja Meier, 2012);
• Garminge Vroeger (Herinneringen van Egbert Bussemaker aan zijn jongenstijd in Garminge in de vijftiger jaren (2013);
• Hen boeten (2016)
• Met LIMERICKS deur Drenthe (2017);
• Garm 1950 (Dorpsherinneringen van Egbert Bussemaker) (2019)
• Ringenetten (2019)
• Wieder gaon (2019)

Hierunder het körtste gedicht van Egbert Bussemaker. Het gedicht is oet 2012 en is indertied veurdragen op een schrieversmiddag.

Verstaon
Zie zee wat
Hij zee niks
Dat zeg alles