Ger Veenstra

Ger Veenstra is geboren op 5 mei 1946 in Assen.

Ger Veenstra (1946)

Nao diensttied warkt’e in het underwies; in Dwingel in het leger underwies en in het veurtgezet underwies in Börger. Hie gaf les in verschillende vakken en was decaan. In het begun schreef Ger veur zien eigen plezeer Drentse gedichten. Zien inspiratiebronnen waren de verhalen oet In het schemeruur bij ’t knappend vuur van J.J. Uilenberg en de radioverhalen van Mans Tierelier. 

Ger Veenstra debuteerde in 2004 met het gedicht Veurjaor in Oeze Volk. As streektaolvrijwilliger van het Huus van de Taol organiseert Veenstra verscheiden activiteiten zoas Drentse poëzieaovends en veurleessessies op basisschoelen in de meertmaond-streektaalmaond. As ambtenaar van de burgerlijke stand in de gemiente Börger-Odoorn trouwt e op verzuuk in het Drents.

Ger Veenstra is docent Drents en corrector bij het Huus van de Taol /Het Drentse Boek.

In 2014 verscheen in eigen beheer de dichtbundel: Bochten wiest de stroom zien loop. Een aantal gedichten oet dizze bundel weurden ok in aandere bloemlezings opnummen, zoas As het er toe döt, een bundel met gelegenheidsteksten die bij rouw te gebroeken bint (2014, Het Drentse Boek).
In 2017 kwam Oet de schoel klapt oet (eigen beheer)een verzameling verhalen oet het underwiesleven van Ger Veenstra

 

Boekpublicaties:

  • Bochten wies de stroom zien loop (2014);
  • Oet de schoel klapt (2017).

 

Een gedicht van Ger Veenstra:

Oet de tied

Dood was heur genaodig
met een milde variant
zunder dat zie der arg in had
pakt’e zacht heur bij de hand

niet as een schok, weerspannig
het is meer een glieren west
overmand deur ieuwig slaopen
’n onheurbaore zucht nog op het lest

starven huuft niet slim te wezen
aj an het end van je bestaon
nao een riek, gelukkig leven
zachies oet de tied mag gaon

Oet: Bochten wiest de stroom zien loop (eigen beheer 2014)
Ok plaotst in As het er toe döt (Het Drentse Boek 2014)