Heksen en Blauwvarven

Moi! Mooi daj metwarken wilt an het project Heksen en Blauwvarven.

 

Hier kuj het formulier invullen waormet je woorden en oetdrukkings veur het project instuurt. Woj meer weten over het project? Under het formulier stiet meer infermatie over het project en waw dermet doen gaot.

 

Meer doen?

Dat kan! Vanoet de hiele provincie zuuk wij vrijwilligers die metandoen wilt an bronnenunderzuuk of interviews wilt ofnemen bij oldere Drèentspraoters. Nim contact op via info@huusvandetaol.nl of per tillefoon (0593 – 371010).

Ik wil woorden insturen

Velden met een * moej altied invullen

Eerst vraog wij je wat dingen over jezölf. Zo kuw goed in kaort brengen waor de ingestuurde woorden vortkomt en weew je te vinden aw vraogen hebt. *

*

Met je gegevens gaow vanzölf veurzichtig um. Wij zult je gegevens allén maor gebroeken veur de underzuuksdoeleinden en wij zult ze zekers niet dielen met aandere partijen. Veur vraogen hierover kuj altied mailen naor info@huusvandetaol.nl.

 

Waw doen gaot

Met het project Heksen & Blauwvarven wilt het Huus van de Taol en het Drents Archief Dreintse woorden en oetdrukkings vanneis op batterij brengen en nei leven inblaozen.

Het giet hierbij um woorden die nog prima gebroekt kunt worden: seins veur soms, of scheuveln veur schaatsen. Um dit veur mekaor te kriegen, baseren wij oes op de factoren die de taolkundige David Crystal vaststeld hef in zien invloedrieke wark Language Death.

Volgens hum bint (naost de holding van de sprekers en niet-sprekers tegenover de taol) de belangriekste factoren veur het revitaliseren van een taol:

(1) De taol anwezig laoten wezen in educatieve omgevingen;

(2) een geschreven variant van de taol hebben;

(3) en de taol via moderne technologieën naor boeten brengen.

 

Veur dit project zuken wij naor Drentse idioom (woordenschat en oetdrukkings) die dreigt te verdwienen, maor die nog wál een realistische toekomst hebt, zodat de rieke woordenschat van het Drents beholden blef.

Het giet niet um archaïsche woorden, dus woorden die al zó lang niet meer gebroekt wordt dat zowat gieniene ze nog kent of woorden die in de samenleving van nou gien toepassing meer hebt.

 

Hoe gaow dat doen?

De basis van dit project is het verzaomeln van het idioom. Wij moet de verdwienende Dreintse oetdrukkings en woorden eerst verzaomeln veur we die weer kunt herintroduceren bij het publiek.

Dat doew op verschillende manieren:

  1. Bronnenunderzuuk

In de bibliotheek van het Huus van de Taol zal deur een groep vrijwilligers zöcht worden naor geschikte woorden en oetdrokkings in de anwezige boeken en tiedschriften. Ok ploest ze het woordenboek van de Drentse Dialecten oet.

Per woord of oetdrukking zal de betiekenis in het Nederlands opschreven worden en de regio waor e vortkomt.

  1. Interviews

Veur de interviews zuken wij per gemiente umdebij 10 respondenten, mensen die aw interviewen kunt. Zij bint older as 75 jaor, moet de lokale variant van het Drents goed beheersen en bint het liefst ok in de gemiente opgruid.

  1. Publieksinbreng

Via een formulier op oeze eigen website en papieren formulieren via lokale bladen en kraanten, kan elkenien die een bijdraoge levern wil een formulier invullen waorop aj vief woorden die niet verleuren magt gaon insturen kunt.

 

Wat wiw dermet?

Alle verzaomelde woorden en oetdrukkings wordt deur gekwalificeerde vrijwilligers indeeld op underwarp en regio, zoas beschreven deur G. H. Kocks. Ze wordt ok veurzien van een Nederlandse vertaoling um later het zuken makkelijker te maken.

Ok de vörm die de echt Drentse vorm dreigt te verdrukken zal – as die der is – noteerd worden.

Bij het Drents Archief wordt met dizze woorden een educatieproject opzet, waormet aw schoelen bezuken kunt um dizze woorden weer veur het voetlicht te brengen.

Het Huus van de Taol böd naost de deurzuukbare liest ok lezingen rond dit underwarp an.

In een vervolgstadium kuj nog denken an projecten met dizze opgebrachte woordenschat, zoas meziekworkshops (liedteksten schrieven), schriefwarkgroepen, digitaal materiaal veur het underwies en taolpublicaties rond dit underwarp.

 

Hej nog meer vraogen? Nim contact op via info@huusvandetaol.nl