Neie handreiking fietert streektaol in het basisunderwies an

De Underwiesraod prissenteerde in september 2025 een advies um taolige diversiteit in de klas te gebroeken, umdat het een positief effect hef op taolontwikkeling van kinder. In naovolging van dit advies hebt de Nedersaksische streektaolinstituten met de Handreiking Streektaol-, Meertaoligheid- en Thuustaolunderwies oetbracht.  Daorbij sluut ze an bij het thema van de Kinderboekenweek, ‘op aoventuur’, met extra lesmateriaal dat leerkrachten oetdaagt um met de streektaol gangs te gaon. 

Het Nedersaksisch, waor ok het Drents under valt, is een belangriek underdiel van de samenleving in Grunning, Drenthe, de Stellinwarven, Overiessel en Gelderland. Ok de taol van Urk en Bunschoten-Spakenburg valt under de Nedersaksische streektaolen. De streektaolinstituten vindt het belangriek dat kinder in dizze regio opgruit met en kennis nimt van de streektaol.

Daorum hebt ze de Handreiking Streektaal-, Meertaligheid- en Thuistaalonderwijs schreven. Dizze handreiking veur leerkrachten stiet vol praktische meugelijkheden die op een makkelijke manier streektaol in de klas brengt.

Meertaoligheid in de klas is een actueel underwarp: oet underzuuk blek dat meertaolig wezen positief is veur de cognitieve ontwikkeling van kinder. Zo leert een meertaolig kind makkelijker aandere taolen en kan het zuch makkelijker verplaotsen in de aander. Drents is zu’n (extra) taol, daorum dat ok ruumte veur streektaolen niet mag missen. Meertaoligheid is dus niet allent leuk, maor ok hartstikke nuttig!

Met praktische tips en veurbeelden wilt de streektaolinstituten leerkrachten inspireren um streektaol een plek binnen heur lessen te geven. Bij de handreiking heurt een speciaal lespakket um het aoventuur um les te geven over/met het Nedersaksisch an te gaon. De Handreiking en het lespakket bint gratis te downloaden op de website van Levende Talen Nedersaksisch.