Bianca Haan oet Tweide Mond is de neie streektaolambasseur veur het Huus van de Taol in Börger-Oring. As streektaolambassadeur zal ze der met een koppel vrijwilligers veur zörgen dat er streektaolactiviteiten in heur gemiente organiseerd wordt.

Haan is diep wörteld in dizze streek: ‘Mien pappe komt uut Valthermond en mien mamme uut Tweide Mond. Thuus spreken wie aaltied streektaol; in oons geval het veenkoloniaols, ain van de varianten van het Drints. Veur mie is het Nedersaksisch waor het Drints met al zien varianten tou beheurt een belangriek stukje cultuur dat beholden blieven mout. Het is nait allent een menaaier van praoten, mor ook een menaaier van leven en van verbinding. Ik vin ‘t belangriek dat ok de jongste generaotie wet waor ze votkomt. Ok is het prachtig om minsken, dei de streektaol nait machtig binnen, wat van oonze taol met te geven en kennis te laoten maoken met oonze Drintse cultuur.’

Renate Snoeijing, directeur van het Huus van de Taol: ‘Bianca stek geern de haanden uut de mouwen. Of dat nou is in de politiek, in de bibliotheek op de schoel van de jongsten of in het kindertheater. Ze döt alles met veul plezier. En vanof nou zet ze zuch ok in veur de Drèentse taol in de gemiente Börger-Oring. Daor biw hiel wies met.’