Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Dörpshoesbeheerder Ronald Buld begunde zien carrière ooit as ‘tuunhaze’ zoas e zölf zeg. Hie warkte 15 jaor in het gruun, veurdat e der achterkwam dat e misschien toch beter met mèensen warken kun.

Bakkerij
Buld zien va en moe hadden een bakkerij, waordeur der in het gezin altied reuring was: ‘In de bakkerij was het natuurlijk altied feest, want ik much altied slagroom pruven as ik dan weer kwame. Ik had altied de snoete vol met slagroom’. Zien olde lu warkten keihard, maor meuken ok echt tied vrij um met het gezin deur te brengen.

Motto
Buld zöt het leven as ien groot aoventuur en hij zöt wal hoe het op hum an komp: ‘Ik zie ok altied allent mar meugelijkheden, nooit problemen’.  Zo stund e as klein jonkie al in het leven en dat is nooit veraanderd.

Drok
‘Meinsen kent mij as drok, maor ik bin eigenlijk best wel rustig’. Dat veraandert as Buld veur een microfoon komp te staon of op een podium, dan giet zien ADHD-gehalte, zoas e dat zölf nuumt, aordig umhoog.

Dörpshoes
Buld hef altied op Runerwold woond en kent het dörpshoes dus al zien hiele leven. ‘Ik heb ooit een keer as klein kiendtie ezegd tegen mien moe van ‘as ik toch een keertie Berend Bartelds kun worden…’’. En nou is e, net as Bartelds vrogger, zölf de beheerder van het dörpshoes. Buld hoopt dat e later net zukke mooie verhalen vertellen kan as de vrouw van Bartelds nou op woensdagaovend bij het biljarten vertelt.

Liefde
Buld en zien vrouw Karin hebt mekaar ooit tröffen bij Klok. Maor hij hef der echt wark van moeten maken um verkering met heur te kriegen. Zien moe vreug zuch al of waorum Buld iniene altied met zien jongere breurtie met wol hen scheuveltraining in Assen. Totdat dudelijk weur dat Karin ok in die groep zat. Intussen bint ze dartig jaor samen en hebt ze veer kinder.

Dizze oflevering is vanof nou te belustern op alle bekende streamingdiensten, maor ok op de website van RTV Drenthe.