Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.
Pedicure Mabel Stuiver gruide op as jongste in een gezin met drei wichter: ‘Volgens zeggen was ik de ondeugendste.’ Ze speulde het liefst met jongen, want as ze daor een maol ruzie met har, dan vöchten ze het oet en was het klaor. Met wichter warkte dat aans en dat lag heur niet. Nog aal niet.
Niet naor de LTS
Mabel har hiel geern naor de LTS wild, maor in die tied muchten wichter daor nog niet hen. Dus hef ze met veul tegenzin de MAVO daon. Daornao gung ze nog een toertie hen de detailhandelschoel, maor oeteindelijk stopte ze en gung an het wark in de horeca.
Pedicure
Toen Stuiver rond heur 35e op zuuk mus naor nei wark, stelde heur moe veur um pedicure te worden. Heur eerste reactie was ‘Mam, ik ga toch niet met zweetvoeten an de gang?!’ Toch was ze neisgierig en hef ze intussen al hiel lang een eigen pedicuresalon. En as pedicure is ze der soms psycholoog en maatschappelijk warker bij. En dat sociale is nou precies wat ze mooi vindt.
Stichting Goed Gevoel
Via heur wark as pedicure kwam Stuiver derachter dat er toch best een bult mèensen in de gemiente bint die het financieel niks te bried hebt, maor toch deur regels overal net boeten de boot valt. Wat met een kleine inzameling begunde is intussen oetgruid tot Stichting Goed Gevoel. Een stichting met 17 vrijwilligers.
Politiek
Stuiver hef zuch bij de gemienteraod ok hard maakt veur heur achterban. Daor kwam wal wat reactie op, maor het hef oeteindelijk niks opsmeten: ‘Ik heb net zo lief dat aj niks veur mij kunt doen, daj dat gewoon eerlijk zegt.’
Heur onvrede over hoe dingen politiek gaot hebt heur dertoe beweugen zölf de politiek in te gaon. En dizze gemienteraodsverkiezingen stund ze dan ok op de liest.
Dizze neie oflevering is vanof nou te belustern op alle bekende streamingdiensten en op de websites van het Huus van de Taol en RTV Drenthe.