Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.
Cultureel undernimmer Delia Bremer gruide op an ’t Hogeveine as de jongste in een gezin met zes kinder: ‘Mien moeder zee ok altied: ‘Ik bin net een busse, der zit altied volk in.’ As Benjamin van het gezin was ze altied vort, heur zussen mussen heur altied weer opzuken. Nao de scheiding van heur olde lu brengt ze heur vekaansies deur bij heur pap in België.
Wark
Naodat ze klaor is met schoel gung ze geliek an het wark. Ze mus der niet an dèenken um deur te leren. Bremer hef altied eigen undernimmingen had, maor warkte in het begun ok bij de bakker en bij de baank. Het allermooiste vindt ze het um met mèensen te warken: ‘Meinsen veurzien van wat ze graag wilt hebben, wat ze neudig bint. Ja, da’s mooi!’
Ienwiefsbedrief
Vandaag de dag hef ze al hiel lang een ‘eenwijfsbedrijf’ zoas ze het zölf nuumt. Toen ze zuch inschreef bij de Kamer van Koophandel weur ze feliciteerd met heur ‘eenmanszaak’: ‘Nou, ie kunt ’t toch wel zien, of niet? Ik bin een vrouwe!’.
Het belangriekste wat ze met heur bedrief döt is schrieven en schildern en daor heurt dan ok workshops bij.
Erotische poëzie
Samen met Ria Westerhuis bracht Bremer een bundel met erotische poëzie in het Drèents oet. Daor was ok in de landelijke media veul andacht veur en ze gungen der met het hiele laand deur. Daorbij was heur motto: ‘Elke previncie mut een beurt hebben.’ Allent met Zeeland is dat nog niet lukt.
Tienertoer
Toen ze 38 was meuk Bremer eindelijk de tienertoer die ze op heur 18e niet maken much van heur mamme, die zee: ‘Ie bint de jongste, de mooiste. Ie blieft thuus!’. De reis bracht heur de vrijheid die ze dervan verwacht had.
Dizze oflevering is vanof nou te belustern op alle bekende streamingdiensten zoas Spotify en iTunes, maor ok op de websites van RTV Drenthe en het Huus van de Taol.