Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Adviseur arbo en veiligheid René Edens oet Börger wol as klein jonkie altied al schik hebben. Hie weur ok wal ies het kattenkwaodjonkie nuumd. Het gung daor bij niet allent um bellegie lellen: ‘Met de blote kont in de kofferbak biw een keer flitst bij Gasselt’.

Tankstations
Pa Edens har twei tankstations langs de N33 tussen Raol en Assen. En het was wal de bedoeling dat junior daor op een bepaold moment bij in kommen zul, maor zien pa zee altied ‘Gao eerst maor bij een aander under de vleugels, ik roep je wal as ik dèenk dat het kan.’ Dus begunde Edens zien carrière bij Bussemaker in Exel. Daornao gung e naor het zaandwinningsbedrief van Vos. Nao nog wat umzwarvings kwam e oeteindelijk toch bij zien pa in de zaak.

Braandweer
In 1997 vrag zien buurman Bram hum of e niet bij de braandweer wil. Edens overlegt dat met zien wicht in hoes, die reageerde met ‘Dat kan ja wal, oj der nou achteran riedt of ie zitten der bij in.’ In totaol warkt Edens zowat 26 jaor bij de braandweer in Börger, waorvan 15 jaor as bevelvoerder. Veural de ongevallen waor kinder bij betrökken waren, staot veur altied op zien netvlies.

Tenielspeulen
In zien vrije tied speult Edens teniel bij Op de Gribbelgrab in Börger. Dat is hielemaol zien ding.  Ok is e tegenwoordig te zien in een landelijke reclame veur waterontharders. Dat levert ok reacties op: ‘Der bint wal mèensen bij die dèenkt van hee, ik ken hum. Maor dan zal ik niet zeggen van Ja, dat bin ik.

Veul genieten
Edens dreumt ervan um nog veul te genieten: ‘Dat hef ok een beetie te maken met de brandweer, je hebt wel veul dingen zien die niet leuk waren.’ Hie is drok gangs met een olde brommer, dus binnenkört giet e op de plof rond. Ok mag e geern met de camper op pad gaon. Hie wil allent maor mooie dingen doen.

Dizze oflevering is vanof nou te belustern op alle bekende streamingdiensten zoas Spotify en iTunes, maor ok op de websites van RTV Drenthe en het Huus van de Taol.