Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.
Taolheld Gea Mulder oet Haovelte har as kind al muite met lezen en schrieven: ‘In mien tied wordde het een beetie bestempeld as dyslexie.’ Mulder weur al pest umdat ze rood haor har, maor umdat ze niet metkommen kun in de klas weur dat pesten nog slimmer. Vandaag de dag wet Mulder dat ze leeggeletterd was, maor destieds was daor weinig over bekend.
An het wark
Mulder hef de middelbare schoel wal ofmaakt, maor toen het op examens an kwam, zakte ze. Deur heur leeggeletterdheid begreep ze weinig van de examens. Heur va zee toen ‘Ik heb liever daj an het wark gaot, want ie kost mij allent maor geld.’ Mulder hef van alles daon, van kippen vangen en schoonmaken tot an horeca en productiewark. In die tied was dat nog goed te doen, maor gaondeweg markte Mulder wal dat er aal meer vraogd weur naor diploma’s. En zo komp ze oeteindelijk in de WW terecht.
De ummekeer
As Mulder een maol op het gemientehoes weden möt um wat te regeln komp ze in gesprek met iene die heur vertelt dat er ok lessen bint veur mèensen die muite hebt met taol: ‘Ik bin toen weer terog-egaone naor schoele’. En dat vindt ze nog altied de beste keus die ze maakt hef.
Taolheld
Mulder weur taolambassadeur en giet al 10 jaor langs bedrieven um ze oet te leggen waorum ze beter ienvoldige taol gebroeken kunt. Oeteindelijk gef Hissy Brouwer van de bibliotheek in Haovelte Mulder opgeven veur de verkiezing van taolheld, umdat ze vindt dat Mulder een groot veurbeeld veur aandern is. Ze wint in Drenthe en tot heur eigen verbaozing daornao ok nog de laandelijke verkiezing.
Mulder hef de smaak van taol intussen zo goed te pakken, dat ze al ien boek schreven hef en nou met heur tweide boek gangs is.
Dizze oflevering is vanof nou te belustern op alle bekende streamingdiensten zoas Spotify en iTunes, maor ok op de websites van RTV Drenthe en het Huus van de Taol.