Underzuuk naor de Drentse taol klaor: Drents blef geliefd, maor gebroek stiet under druk
Het Drents blef een belangriek underdiel van de Drentse identiteit, maor het actieve gebroek van de taol stiet under druk. Dat blek oet het underzuuk Staat van het Drents 2026, dat de previncie Drenthe op verzuuk van Provinciale Staten oetvoeren laoten hef. Ok het Huus van de Taol was betrökken bij de oetvoering van het underzuuk waor dik 2000 inwoners van Drenthe metandeden.
Oet het underzuuk blek dat veul inwoners het Drents wardeert en goed verstaon kunt, ok inwoners die niet in Drenthe geboren bint of het Drèents weinig of zowat niet praot. 76% van de inwoners stiet positief tegenover het Drents en 88% kan de taol goed verstaon. Tegeliekertied prat nog maor 43% van de Drenten het Drents dagelijks of wekelijks. Het Drents wordt dan veural in hoes, met femilie, kammeraoden of in het dörp praot. Veul mèensen gebroekt het Drents veural thoes, met femilie, kameraoden of in het dörp. Op het wark, in het underwies, de zörg en bij de overheid gebeurt dat veul minder.Inwoners die het Drents redelijk tot goed beheerst geeft an dat het praoten van het Drents stark ofhankelijk is van de umgeving en de gesprekspartner.
Veul inwoners hebt verlet um meer zichtbaarheid van het Drents. Veural jongern (18 tot 34 jaor) wilt de taol vaker zien en heuren, bijveurbeeld bij evenementen, in winkels, de horeca en openbare gebouwen. Veur de toekomst van het Drents lat het underzuuk wat belangrieks zien: kinder die al jong met het Drents in anraking komt, beheerst de taol later beter en gebroekt heur vaker.
Anbevelings
- samenwarking in Drenthe. Doel is het betrekken van Drentse gemienten bij de doelen en hier gezamenlijk een ofspraak over te maken;
- samenwarking met Marketing Drenthe en aandere toeristisch-recreactieve partijen um undernimmers in die sector te betrekken bij de meugelijkheden van het meer zichtbaar maken van de Drentse taol in winkels en horeca;
- een inspiratiebijienkomst veur makers en evenementorganisators (en beleidsmakers) organiseren in het kader van het gebroek van het Nedersaksisch/Drents in culturele productie en evenementen;
- inzetten op een specialist op het gebied van marketingcommunicatie veur het Huus van de Taol;
- de strategische hoofddoelen opnimmen in de plannen, producten en diensten van het Huus van de Taol.
De risseltaten van het underzuuk en de anbevelings vörm een belangrieke basis veur toekomstige keuze binnen het Drentse streektaolbeleid. Provincie Drenthe en het Huus van de Taol gaot de ankommen periode samen met gemientes en aandere partners verkennen hoe de anbevelings wieder oetwarkt worden kunt.
Dit underzuuk naor de Staat van het Drents is oetvoerd naor anleiding van een motie van Provinciale Staten.
Meer informatie over het underzuuk kuj op de website van de previncie vinden.