Al jaoren een vast begrip op het gebied van Drèentstaolige meziek

Daniël Lohues is op 16 febrewaori 1971 in Emmen geboren. In 1984 kreeg e met Sunterklaos zien eerste gitaar (daor har e al lang um zeurd). Hie leert zuchzölf speulen en zien grote veurbeelden bint The Beatles, The Rolling Stones, Bob Dylan, Prince, Pink Floyd en Robert Johnson.

As e niggentien is, wordt e vraogd um bij The Charlies te kommen speulen. Dat is een populaire band die net van Emmen naor Utrecht verhoesd was. Daniël pakt zien tas en gitaar en giet ok naor dizze stad. The Charlies maakt een cd, zie treedt op en komt op radio en tillevisie. En… Daniël begunt liedties te schrieven in de taol van thoes. Met Maarten van de Helm en Marlen Davers giet e dizze liedties speulen. Het is dan 1994 en SKIK zöt het levenslocht. Der komt een eerste cd van dizze band. Daniël verhoest weerum naor Drenthe. Een tweede cd, Niks is zoas ‘t lek, wordt maakt. Nog meer albums volgt. Op fietse komt oet.

Dan vindt Daniël dat het tied wordt veur wat aans. Hie giet produceren en liedties veur aandern schrieven. Under andern Guus Meeuwis, Paul de Leeuw, Jenny Arean, Freek de Jonge en Kinderen voor Kinderen nimt liedties van Lohues op. Hie schref een lied veur de film ‘Van God Los’, maakt muziek bij commercials en begunt met het aal week schrieven van een column in Dagblad van het Noorden.

Daniël wil ok zien haat/liefde-verholding met de blues oetdiepen en hie beslöt een bluesplaat maken te gaon in het zuden van de VS. Lohues & the Louisiana Blues Club is een feit. Heur eerste CD, Ja Boeh, is metien een voltreffer. ‘Umdat het zo mooi giet’ nimt Lohues & the Louisiana Blues Club een tweede cd op die Grip heten giet. Een neie tour beleeft zien hoogtepunt as ze in het veurprogramma van The Rolling Stones in Nijmegen optreden mugt. Maor daornao is het weer over met de blues.

Allennig döt Daniël Lohues ok een stuk of wat veurprogramma’s. De liedties die e schref um allén oetvoeren te kunnen zet e op een cd die de titel Allennig kreg. Het idee ontstiet um daor vier van te maken, waorbij Allennig l dan de winter is. Daniël nimt het besluut het theater in te gaon um de Allennig-liedties live te speulen. Het blek dat het verhalen vertellen hum in het theater geweldig goed ofgiet. De combinatie met zien geweldige muziek mak dat de veurstellingen in het hiele laand loopt as een tuut en vrijwal altied oetverkocht bint. Allennig wordt slim goed ontvangen en met het nummer Annelie wint Daniël Lohues de Annie M.G. Schmidtpries. Allennig ll, lll en lV volgt.

Veul mèensen leest de zaoterdagse column in Dagblad van het Noorden (die Daniël altied op vrijdag schref) met geweldiog veul wil en under de titel Zes Jaar Vrijdagmiddag komt er een bundel van oet (zien eerste boek).

Nao de Allennig-serie mak Lohues samen met Guus Strijbosch (contrabas) en aanstörmend snarentalent Bernard Gepken de cd Hout Moet (die een Edison in de categorie kleinkunst kreg). Weer een succesvolle theatertour volgt. In oktober 2019 toert Daniël Lohues samen met Holland Baroque deur Nederland in een muzikaal programma waorin Johann Sebastian Bach een grote rol speult. De theatertour die veur 2020 pland was, hef Daniël Lohues ofzeggen moeten.

 

Discografie (excusief singels):

cd’s:

• Allennig (2006)
• Allennig II (2008)
• Allennig III (2009)
• Allennig IV (2010)
• Hout moet (2011)
• Gunder (2012)
• Ericana” (2013)
• D (2014)
• Aosem (2016)
• Moi (2017)
• Vlier (2018)
• Elektrisch live (2019)
• Sowieso (2019)

cd’s samen met de Louisiana Blues Club:

• Ja Boeh (2003)
• Grip (2004)

cd’s SKIK:

• SKIK (1995)
• Niks is zoas ’t lek (1997)
• ’s Nachts (1999)
• Overal en nergens (2000)
• Tof (2002)
• Best tof (2004)

Kiek ok op:         www.lohues.nl
www.streektaalzang.nl