Drentstaolige rock & roll

Mooi Wark is der sinds jannewaori 1992 en weur doedertied opricht deur zanger-gitarist Bert Koops en basgitarist Henk Oosting.

De streektaolpopgroep meuk vanof het begun Drentstaolige rock & roll en weur in de previncie slim populair. Ok landelijk weur de band bekend en geliefd.

Mooi Wark stun in de finale van het Noord Nederlandse Liedjes Festival in Stad. Ok trad de band op in veurprogramma’s van Normaal,  Golden Earring, Rowwen Hèze en De Dijk. De muziek veraanderde van boerenrock naor echte rock met een beetie punk. De teksten bleven Drents.

De band har niet altied dezölfde leden, maor in 2002 bestun Mooi Wark oet Bert Koops (zang en gitaar), William Bosssong (zang en bas), Arnold Kuik (gitaar) en Jasper Dam (drums). Dennis Hendriks nam  de plaots in van Jasper Dam, maor ok Dennis gung wat aans doen en daornao nam John Roffel (19 september 1963) de drumstokkies over.
Mooi Waark meuk samen met de Lawineboys in 2007 de carnavalssingle In de blote kont. Het lied weur oetvoerd in een Nederlandse en een Drentse versie.
In 2017 vertelde John Roffel dat e stoppen gung met Mooi Wark, umdat e ongeneeslijk ziek was. Hie vreug Dennis Hendriks of e de drumstokkies weer van hum overnimmen wol. Dennis wol dat wal en John kwam körte tied later inderdaod oet de tied (op 31 oktober 2017). Robbert Oosting meuk veur RTV Drenthe nog een indrukwekkend portret van en samen met John.

Dicografie:

Mooi Wark hef de volgende cd’s maakt:

• Zwoegen in ‘t heuj (1992)
• Zo plat as wat (1996)
• Kieken wat ‘t wordt (1999)
• Gang op de Ket (2001)
• Only rock n roll (2003)
• Smeer (2004)
• Gewoon idioot! (2005)
• Of niet dan? (2006)
• Achter de tent (2007)
• Bok’m d’r op (2008)
• Rock en Rodzooi (2009)
• X (2010)
• Wrieven, pappen en nat hollen (2011)
• ‘t Mooiste wark / 20 jaar (2012)
• Allent veur joe (2014)
• D’r op! Of gien vreten (2016)
• Siepelrock (2018)

Kiek ok op: www.mooiwark.nl

In 2021 weur William Bossong deur Renate Snoeijing interviewd in de podcast Praot Drents met mij.