In Memoriam Willem Pol

(Tolbert 1936 – Groningen 2014)

De Drèentse schriever Willem Pol is begun mei nao een
kôrte periode van zeeikte oet de tied kommen. Willem Pol was een vrolijke, slim
actieve man die altied gangs was met zien leeifhebberijen: de motorsport,
lokaole geschiedenis en de Drèentse taol. Een maond of wat leden kwam der nog
een nei boouk van hum oet over GREMI, het bedrief waor e jaorenlaang waarkt
hef. En in april dee e nog met an tweei ‘workshops’: kinderverhaolen schrieven
van het Huus van de Taol.

Willem Pol wôr geboren in Tolbert in 1936 as zeun van een
keuterboertie, mor het grootste deeil van zien leven hef e in Nôrg woond, meer
as vieftig jaor. In de taol van dat dôrp schreef e ok, al sloop der bij toeren
wel ies een woord oet ‘t Westerkwarteer zien verhaolen binnen.

Van 2008 of, doe e bij de schriefwedstried van het Huus
van de Taol de daarde pries won met zien verhaol ‘Boerenkool’, leverd’e
regelmaotig verhaolen en gedichten an veur Maandewark-Oeze Volk. Zien Drèentse
verhaolen, over Harm en Annechie, een echtpaor op leeftied, binnen bundeld in
Nôrger tôrfies, oetgeven bij Het Drentse Boek en Spoor in ‘t zaand, dat
oetgeven is bij Noordboek. Willem was een echte verteller, hij schreef gien
stoere verhaolen, meer om ‘t plezeer van ‘t schrieven en lezen. Het binnen
verhaolen met een glimlach, herkenbaor. Elkeneein hef wel een soort van Haarm
en Annechie in de buurt wonen.

Dat het Drèents hum nao an het hart lag, blik oet zien
overliedensadvertèensie. Een gedicht van humzôlf:

Mien leven is veurbij

ik ben now oet de tied

heb der oethaold wat ik kun

mien leven is veurbij

plezier, verdreit, alles zat der in

het was het dan ok weerd

mien leven is veurbij

ik ben now oet de tied

Willem is 78 jaor worden. Wij wèensen zien kinder,
kleinkinder, vriendin en de rest van de femilie veul staarkte.

Maandewark / Oeze Volk tweemaondelijks blad in de Drentse
taol