Roelof Sieben is oet de tied kommen M.C. 12-07-2006
Roelof Sieben is oet de tied kommen M.C. 12-07-2006
Roelof Sieben is oet de tied kommen
Zaoterdag 8 juli lestleden is de Drèentse schriever Roelof Sieben oet de tied kommen. Roelof Sieben weur op 22 april 1919 in Runerwold geboren. Hie is opgruid in Fort, de veurmaolige gemiente Zuudwolde, umdat zien mam jong kwam te overlieden.
Roelof Sieben was een actieve kirrel, die veul verschillende dinger anpakt hef in zien leven. Hie hef eerst bij een boer warkt, hie hef reiziger west, winkelier en heufd van een bejaordenhoes. Veur bruloften en partijen wussen ze hum te vinden, want zien gedichten en veurdrachten meuken hum gewild as conferencier.
Umdat e preblemen met de ogen har en die aal arger weur-
den, mus e stoppen met warken. Maor hie was een echte deurzet ter en al kun e slecht zien (hie har een speciale typemachine met grotere letters en lampen der naast staon veur extra locht), hie begunde aal meer te schrieven. Zo kwam e van 1983 of nog tot een beheurlijke productie.
Maor daorveur was Roelof Sieben ok al schriever. Zoas hierboven al stiet, schreef e dinger um veur te dragen bij gelegenheden as bruloften en feesten. In “Oes eig’n Kraantien”, een wekelijks oetkommend tiedschrift in zien toenmaolige woonplaots Zweel, . hef e meer as honderd humoristische verhalen schreven under de titel “De wereld van Joppie”.
De leste jaoren van zien leven weur e verpleegd in ‘De Schiphorst’ in Meppel, waor e toch nog onverwacht oet de tied kommen is. Roelof Sieben was trouwd en har drei kinder en zes kleinkinder. Boeken van Roelof Sieben bint: Van heuren zeggen (1983), Een stuk of wat losse centen (kinderboek oet 1984), Van de môrreng tot de aovend (1986), Van komen en van gaon (1988), Waar liefde woont (1989), De jonge Johanna (1991), De wereld van Joppie (z.j.), De veurdeur is los (z.j.).
Drents Volkslied
Roelof Sieben mus niks hebben van het zogenuumde Drents Volkslied van J.J.Uilenberg. Hie zee daor over: “Het wordt wal ies zien as het Drents Volkslied, maor veur veul Drenten is het dat niet, hef het dat nooit west en zal het dat ok nooit worden.” En wieder: “Wat inhold betreft vin ik het slim overdreven. ”
En aj wat niet zo goed vindt, kuj de kop in de schoot leggen en het zo laoten. Maor zo was Roelof Sieben niet. Hie hef zôlf een aander volkslied schreven
Jan Germs